Plie u Myntri ka Sorkar pdeng u Sonowal ia ka Guest House bad buh Mawnongrim ban tei ia ka ophis ka NEIAH

Syllad | The Rising MeghalayaFebruary 25, 2024

U Myntri ka sorkar pdeng uba khmih ia ka Tnat AYUSH, u Sarbananda Sonowal ha ka 23 tarik mynta u bnai u la wan ban plie ia ka Guest house bad buh ruh ia u Maw nongrim na ka bynta ka jingtei ia ka ophis treikam (Administrative building), Pharmacy building bad ban ker kynroh ia u pud u sam jong ka North Eastern Institute of Ayurveda & Homoeopathy (NEIAH) ha Mawdiangdiang, Shillong.

Haba aijingkren kum u Kongsan ha ka prokram u Sonowal u la ai khublei ia ka NEIAH namar ka jingioh ia ka jingshaniah na ki nongshong shnong ka Meghalaya ha ka rukom ai jingsumar lyngba ka AYUSH.

U la pynpaw ruh ia ka jingkyrshan ba la ioh na u Myntri Rangbahduh ka Ri, u Narendra Modi na ka bynta ka jingkiew jong ka rukom ai jingsumar AYUSH. U la ong ba hapoh ka jingialam bad jingiohi jngai jong u PM Modi, ka rukom ai jingsumar AYUSH ka la kiew sted bad pawnam ha kylleng ka pyrthei.  Nalor kata u pynshlur ruh ia ka NEIAH ba kan long ka jaka pdeng  jong ka ‘Medical Value travel Tourism’ namar ka don ha ka nongbah kaba itynnad jong ka Ri. 

Kane ka Guest House kaba la plie thymmai ka don ha ka jaka kaba 1780.56 SqM ka ban ai jaka sah bad kaba don ki lad ban pynlong jingialang. Ia kane ka jingtei kaba la pyndep kadei kaba iahap bad ka mariang bad ka don lut baroh ki jingdonkam katkum ka juk mynta.

Katba ka Administrative Building ban dang shna jong ka NEIAH, ha ka jingheh kaba 3160 SqM kan don kawei ka building (G+3) ryngkat artylli ki mala ba sha trai duh, kynthup kawei ka hall.  Ka jinglut ba la mangna ka bynta kane ka jingtei kalong T. 27.30 klur. Ia ka building jong ka pharmacy yn shna ha ka jingbei tyngka kaba T. 15.33 klur na ka bynta ka G+3 building kaba 1833 SqM. Ia ka kynroh bad ka surok kaba la pynshaisharak ba kynthup ka khyrdop ban rung bad mih la shna ha ka jinglut kaba T. 12.72 klur.

U Sonowal u la pynbna ruh ba ki jingshakri OPD kin sdang ha Smit, East Khasi Hills district ka ban long ka jingmyntoi ia kumba 40,000 ngut ki briew kiba sah ha 20 tylli ki shnong. U Myntri u la pyntip ruh ba ka NEIAH ka la sdang ia ka Swarnabindu Prashan Sanskar (AyurvedicImmunno Modulation in Children) ha ka Ayurveda Hospital jong ka. Lyngba kane ka prokram, ka sorkar ka iarap ia ki nongpang lyngba ki lad jingsumar Ayurvedic ban sumar ia ka jingpang Iron Deficiency Anemia (IDA) ha ki longkmie  kiba hapdeng 18 bad 45 snem ka rta ha Mawpat bad Mylliem Block jong ka East Khasi Hills district hapoh ka AYURSWASTHYA Yojana.

U Myntri Khynnah ka sorkar pdeng ba khmih ia ka Tnat Ayush bad Women & Child Development, u Dr Munjapara Mahendra ruh u la iadonlang ha kane ka jingialang lyngba ka bor internet. U Secretary jong ka Ayush, Vaidya Rajesh Kotecha; Vice Chancellor jong ka Northeast Hill University (NEHU), Prof PS Shukla; Joint Secretary, Tnat Ayush, BK Singh; lem bad u Director, NEIAH, Prof Neeta Maheskar ki la iadonlang ha kane ka jingialang

Ia kane ka prokram la sdang da ka  jingthang ia ka sharak bad bud sa ka jingkren pdiang na ka  Dr. Neeta Mahesekar, Director jong ka NEIAH kaba la pynshai halor ka jingkiew ka NEIAH ha kane ka shisnem ba la dep da kaba ai jingsumar ia ki paidbah palat ia ka sanphew hynniew hajar (57000) na baroh arliang ki jingsumar kata ka Ayurveda bad Homoeopathy ryngkat bad ka jingshimti ia ka research projek kaba T.1.42 klur na ka Ministry of Ayush, halor ka jingpang duna snam.