Plie u Myntri ka tnad Arts & Culture ia U Tirot Sing Syiem Museum ha Nongkhlaw

Syllad | The Rising MeghalayaJuly 18, 2024

Lehse kane ka sngi 17 tarik Naitung 2024 kan long ka sngi sahkynmaw ha ka histori pateng pakit hadien ba ka Hima Nongkhlaw kaba dei kawei ka hima kaba la pynmih ia ki khlawait khamtam ia u Paiem Tirot Sing Syiem, Syiem ba shiphew ka Hima Nongkhlaw la ioh ban plie paidbah ia jingtei sahnam – U Tirot Sing Syiem Museum and Cultural Centre of Indigenous Knowledge ia kaba la tei da ka tnad Arts and Culture jong ka sorkar Jylla.

Ia kane ka jingtei sahnam la wan ban plie paidbah da u Bah Paul Lyngdoh, Myntri ka tnad Arts and Culture kum u kongsan ha ka jingiadonlang u Bah Metbah Lyngdoh, MLA ka Mairang u ba dei ruh u Chairman ka State Planning Board,  Bah FR Kharkongngor, Principal Secretary ka tnad Arts & Culture, Bah FM Dopth, Secretary ka tnad Arts & Culture,  D.D Shira, Director ka tnad Arts & Culture, Paiem PM Syiemlieh, Syiem ka Hima Nongkhlaw, Bah Kitbok War, Sordar Shnong Nongkhlaw, ki ophisar bad ki Myntri ka Hima Nongkhlaw.

Lah ban kdew, ba ia kane ka jingtei sahnam na ka bynta u Paiem Tirot Sing Syiem, la tei da ka tnad Arts & Culture ha ka jinglut kaba la kot sha kumba T.2.5 klur ia kaba la mang ruh da ka tnad Tribal Affairs ka sorkar Pdeng, kata naduh ki snem ba u Dr. Mukul Sangma u dang bat kum u Myntri Rangbah ka Jylla.

Hynrei namar ki jingeh ha kiba bun ki liang kumta ym shym la lah ban pyndep ia kane ka jingtei, hynrei dei ha kane ka lyngkhuh sngi iap kaba 189 snem jong u Paiem ka Hima Nongkhlaw la lah ban plie paidbah noh ia ka.

Kumba la sakhi hapoh kane ka jingtei sahnam ki don shibun ki khana, ki tiar siat, ki tiar sahnam ba la pyndonkam da u Paiem Tirot Singh Syiem ha ka por ba ki la iakhun ia ka thma pyrshah ia ki shipai dohlieh bad kiwei ki khana shaphang ka Hima Nongkhlaw kaba dei ka Hima kaba la bna nam hapoh ka jylla  naduh ka jingthmu synshar jubor ki shipai Bilat, kata naduh ba la thmu ban shna ia ka surok na Sylhet sha Dhaka.

Nalor kata la ioh jingtip ruh ba lyngba kane ka jingtei sahnam kan long ruh kum ka lad ban tip ia ka khana pateng la pateng bad ba ki nongwad bniah (Researchers/Scholars) kin ioh ia ka jingtip kaba kham bniah shuh shuh.