Plie u Myntri ka tnat AH & Veterinary ia ka jaka ot doh ha Demthring

Syllad | The Rising MeghalayaDecember 19, 2023

U Myntri ka sorkar Jylla uba khmih ia ka Tnat AH & Veterinary u Bah AL Hek haka 19 tarik Nohprah, ula plie ia ka jaka ot doh ba la ap khmih lynti la slem ia kaba la tip kum ka ‘Modern Bi-Species Abattoir’ ha ka shnong Demthring, West Jaiñtia Hills.

Haba aijingkren kum u Kongsan u Bah AL Hek u la pynpaw ka jingsngew skhem ba kane ka jaka ot doh kaba dang tei thymmai kan lah ban pynmih ia ki doh kiba khuid ba suba. U la kyntu ruh ia ki nong ot doh ba kin ai ka jingiatreilang bad ruh ban pynneh ia ka jingkhuid jingsuba.

Na ka liang u Myntri u la pynpaw ruh ba u la wan jurip ia ka jinglong jingman jong kane ka jaka ha kine ki khyndiat sngi ba la dep hashwa ban plie ia ka khnang ban pynthikna ba baroh kiei kiei kin long kiba iaid beit iaid ryntih.

Na ka liang u Deputy Director (Planning) ka Directorate of AH & Veterinary, u Dr. WMW Khongwir ha ka jingkren u la kdew ba kane ka jaka ot doh bathymmai ka lah ban ot bad pynkhuid haduh kumba 50 tylli ki masi bad 100 tylli ki sniang ha ka shi sngi.

U la ong ruh ba ka jingpyntrei ia kane ka projek ka la sdang naduh u snem 2014, bad ia kane ka jaka ot doh la bei tyngka da ka National Agricultural Bank for Rural Development (NABARD), ha ka jinglut kaba 7.83 klur.

Kiwei pat kiba la aijingkren ha kane ka sngi ki kynthup ia u Lahkmen Rymbui, Wailadmiki Shylla, Limba Dkhar (President ka Jaintia Cattle Butchers’ Welfare Association), Boldness Ryngkhlem, Secretary  Ka Sein Ki Nong Ah Doh Sniang Jaintia Hills, bad u Elword Ryngkhlem, Rangbah Shnong ka shnong Demthring ha ryngkat ka jingiadon lang  Dr. H K Marak, Director ka Tnat AH & Veterinary Department bad u  Dr. DI Kjam, District Veterinary Officer, Jowai.