Plie u Myntri ka Tnat Tourism ia ka ‘Cluster Development Fund Project’ ha Lum Symper

Syllad | The Rising MeghalayaJune 9, 2024

U Myntri ka Tnat Tourism u Bah Paul Lyngdoh ha ka 8 tarik Jylliew ua la leit ban plie ia ka “Cluster Development Fund Project” ha Lum Symper, ha ka jingiadon lang u MLA ka thain u Bah Ollan Suin, Dy CEM ka KHADC u Bah PN Syiem, u MDC ka thain u Bah Alvin K Sawkmie, ki heh na ka Tnat MBMA, CLLMP bad kiwei kiwei.

Haba kren ha ka jingialang u Bah Paul u la pyrto ia ka sienjam ba la shim da ka Raid Saw Symper ha kaba iadei bad ka jingpynneh pynsah ia ka mariang. U la ong ruh ba kane ka sngi ka dei ban pynkynmaw ia ngi ba lada ngi kren shaphang ki kam pynroi ngi dei ban khmih halor ki kam pynroi kiba neh, ki kam pynroi kiba wan lyngba ka jingpynjot ia ka mariang kim dei satia ki kam pynroi hynrei ki dei ki kam pyntroin.

“Ngi sngewkmen shibun ba ka jingdon jong ki khlaw ki btap hapoh Meghalaya ka long kumba 76% hynrei kawei kaba ngi dei ban sngewthuh ka long ba kum ki jaidbynriew trai shnong ka jingiadei kaba jan tam na ka bynta jong ngi ka long bad ka mariang bad ngi shim ruh ia ka mariang jong ngi kum ka kmie jong ngi,” u la ong.

U Bah Paul u la ong ruh ba kum kane ka rukom pyrkhat ka dei ban don hapdeng jong ngi namar kam don kano kano ka lynti suk na ka bynta ka kam pynroi, ka dei ka kamram ka jong ngi ban ai khublei ia ki nongshong shnong halor ka jingshim ia kine ki sienjam ban aijinghikai ia kiwei pat. Kan ym don satia ka kam pynroi ka ban wan jia khlem da don ia ka jingiatreilang hapoh ka imlang ka sahlang.

Nalor kata u la ong ruh, “Ngi la iohi ia kiwei pat ki shnong kum ka Sohra bad kiwei pat kiba ha kaba sdang ki la shaniah ha ka kam ri jingri, hadien ki la phaikhmat sha ki jaka tih par, wat ia ka MCCL ka assembly committee ka la aijingmut ban pynkylla noh sha ka Museium, kane ka pyni ba kine kin ym shan slem, kan iarap tang na ka bynta shipor. Kane kan wanrah pynban ka jingiaphiah ha ka liang ka ioh ka kot hapdeng kiba riewspah bad kiba duk, kan nang pynjur ia ka jingbym ioh jaka, bad ka jubab halor kane ka long tang lyngba ka kam jngohkai pyrthei ne tourism.

Shuh shuh une u Myntri u la ong ruh ba ngi dei ban kyndit bad pynkynmaw ia ki samla ba kane ka sla khyndew kaba ngi im kam dei satia ka jong ngi, hynrei ngi donkam ban sumar ia ka bad ban aiti pat sha ki khun ki ksiew ki jong ngi.Nalor kata u la pynthikna ruh ia ka Raid Saw Symper ba kin ai ka jingiatreilang na ka byna ban pynkhlain bad ban pynneh pynsah ia kane ka jaka.