Plie u Myntri Rangbah bun tylli ki projek, buh maw nongrim iaka PA Sangma Shopping Complex ha West Garo Hills

Syllad | The Rising MeghalayaFebruary 26, 2024

U Myntri Rangbah ka jylla u Conrad K Sangma haka 24 tarik u Rymphang u la plie bun tylli ki projek ha Babadam kaba don ha West Garo Hills ha ka jingdonlang jong u Lamphang ka ïing dorbar thaw aiñ u Thomas A Sangma bad u Myntri ka tnad PHE u Marcuise Marak. 

Ka Agro Food Park ba la khmih bad pynïaid da ka All Garo Hills Multi Purpose Cooperative Society (AGHMPCS) ha ka jinglamkhmat da u  Fr. Sunny Mavelil. Ia kane ka Agro Food Park theh pisa da ka sorkar jylla ha ka jinglut kaba kot sha T. 15.73 klur bad kumjuh ka jaka saiñ symbai tyrso, ka jaka saiñ u Cashew, Hi-Tech Food Lab, ka jaka saiñ sying, Solar Power Plant bad 25 tylli ki Cold Storage Unit. 

Ha ka jingkren ha katei ka sngi u Myntri Rangbah u la ong “Ka sorkar jylla ka dei kaba la dep pynkhreh ki mat treikam kiba yn ai jingkyrshan ïa ki nongrep bad ki nongthung syntiew. Ha kylleng ka jylla, ka sorkar ka dei kaba la pyrshang ban ai jingkyrshan ïa ki nongrep, ka jinghikai halor ka jingsong ki marbam, ka jinglah pynïaid ïew”.

U la ai jingïaroh ïa ka cooperative society ba la lamkhmat da u Fr. Sunny ba u la pyrshang kyntiew ka kam khaïi ha ki jaka kyndong da kaba lum ïa ki marrep.

Dei halor kine ki jingkitkhlieh ban pynkupbor ïa ki nongrep ba ka sorkar ka ai jingkyrshan ban kyntiew  ïa ka kynhun jong ki.

Ka  Agro Food Park kaba dang shu plie thymmai kan saiñ 100 MT ki marrep ha ka shisnem ba kynthup u symbai tyrso, cashew,sying bad u kwai.

Haba kren halor ka jingshimkhia ka sorkar ban kyntiew ka ïoh ka kot ki nongrep ha ka jylla, u la ong, “Ha kine ki hynriew snem lah plie 166 ki jaka saiñ marbam, 154 tylli ki jaka buh marrep bad 34 tylli ki cold storage kiba la lah ban kner wat ki jaka kiba don kham sha kyndong duh ha ka jylla.”

U Myntri Rangbah u la ong ruh ba ka Integrated Village Cooperatives, Farmer Producer Organisation bad Women’s collectives ki dei kiba la pynshlur bad kyntiew da ka sorkar ban wanrah ka jingkylla halor ka ïoh ka kot ha ki jaka kyndong. “Ki don napdeng ki katto katne ki jaka saiñ ki long kiba kynsai tam ha baroh ki jaka ka Thaiñ Shatei Lam Mihngi”.

Ula ong ruh kumba T. 357 klur la mang na ka bynta ban wanrah jingkylla haka rukom pynmih mar bad ban pyniaid iew ha jylla, u la ong, “Ka sorkar kan pynkhlaiñ ïa ki kam ba la don bynta lypa bad ban theh pisa ha kiwei pat ki kam ban poi sha ka thong ban kyntiew arshah ka ïoh ka kot jong 4.5 lak ki longïing jong ki nongrep”.

U la pynpaw ba u don ka jingkyrmen ba ka jingplie ïa ka  Agro Food Park ha Babadam  ka dei ka nuksa ba bha ba lah ban pynbud ha kiwei pat ki jaka ka jylla. U la ong ruh ba ka sorkar kan sa pynbeit ban phah leit tour kawei hadien kawei pat ka kynhun nongrep ban ïoh ïamir jingmut bad ïoh jingtip ba markylliang.

Ha kane ka juh ka sngi la plie ruh ïa ka jaka saiñ kwai bad buh mawnongrim na ka bynta ka  PA Sangma Shopping Complex ha Babadam. 

U MLA Arbinstone Marak bad CEM GHADC Albinush Marak bad kiwei kiwei kila iadonlang ha kane ka sngi plie ia kine ki projek.