Plie u Myntri Rangbah ia ka Babies’ Critical Care Unit hapoh Ganesh Das Hospital

Syllad | The Rising MeghalayaAugust 15, 2024

U Myntri Rangbah ka Jylla u Conrad K Sangma ha ka 14 tarik Nailar u la plie paidbah ia ka Babies’ Critical Care Unit (SNCU, NICU & MNCU) hapoh Ganesh Das Government Maternal and Child Health Hospital, Shillong ha ka jingiadon lang ka Myntri ka tand ka Koit ka khiah ka Kong Ampareen Lyngdoh, Principal Secretary, Health & Family Welfare, Sampath Kumar, Commissioner & Secretary, Health, Dr Joram Beda nalor ki heh ophisar na ka tnad ka koit ka khiah.

Haba kren ha ka jingialang, u CM u la ong ba ki dang don shibun ki lad ban kyntiew ia ki jaka aijingsumar ha ka Jylla, hynrei kam mut pat ba tang ki jingbei tyngka ha ka liang ki jingtei, ki mashin ne ki tiar kiba lah ban wanrah ia ka jingkylla, hynrei ka jingshakri jong ki brew ka dei ka jingpynkylla kaba shisha bad kaba kham khraw.

“Ka long kaba ai mynsiem ban iohi ba ka kynhun ka tnad ka koit ka khiah namar wat hapdeng ki jingeh ki la wanrah ia ka jingkylla ha ki lad aijinsumar ia ki paidbah hapoh Ganesh Das Hspital,” u la ong.U la ong ruh ba kaba kum kane ka khana ka dei ban iasam sha kiwei pat ki jaka sumar ha kylleng ka Jylla khnang ba kin ioh mynsiem ban long ka jingkylla kaba ki kwah ban iohi.

U CM u la ong ruh ba kumba 9 percent na ka mang tyngka jong ka Jylla la pynlut ha ka tnad ka koit ka khiah bad pynthikna bad na ka liang ka sorkar kan bteng ban aijingkyrshan na ka bynta ban pynbha shuh shuh ia ki jingtei hapoh Ganesh Das Hospital.

Nalor kata u la pyntip ruh ba ka Sorkar ka la shim ia ki sienjam kiba khlain bha ban pynthikna bad ha u snem 2025, ka Shillong Medical College kan sdang noh bad kumjuh ia ka Tura Medical College ruh yn sdang naduh ha u snem 2026. “Nga kyrmen skhem ba ha kine ki snem ki ban wan lyngba kine ki Medical College yn lah ban kyntiew ia ka jinglong jingman ha ka liang ka koit ka khiah ha ka jylla ka jong ngi,” u la bynrap.

U CM u la ong ruh ba ka sorkar ka la pynlut kham bun ha ka jingbei tyngka ban pynthikna ban kyntiew bad pynbha ia ki jaka sumar ha ki thain nongkyndong kumjuh, kata kynthup halor ka jingpynbha ia ki jaka sah jong ki nongtrei ka tnad ka koit ka khiah bad ki jingdonkam kiba iadei bad ki lad jingsumar.

Haba ai jingkren kham hashwa, ka Myntri ka tnad ka Koit ka khiah ka Kong Ampareen Lyngdoh ka la ong ka dei ka jingpyrshang jong ka sorkar ban iohi ba uwei pa uwei u nongpang bad iwei pa iwei i khynnah kin ioh ia ka jingsumar kaba bha tam bad kaba khlem donkam jinglut jinsep. Ka la ong ruh ba ka sorkar ka la shimkhia ruh ban khmih halor ki ishu ba iakynduh ki njongtrei kontrak. Ka myntri kala ong ruh ba ka sorkar kan pyrshang ban pynthikna ba ki doktor jong ka jylla, ki dei ban wanphai biang ban ai jingshakri iaka jylla. Kala bynrap kane ka ka Babies’ Critical Care Unit ha Ganesh Das ka dei ka jingkyrmen iaki nongshong shnong ka Jylla.

Shuh shuh kane ka SNCU-NICU complex kaba don 30 jingthiah bad kaba la sdang pyntreikam ha ka 1 tarik Jymmang 2024 da kaba pyndonkam ïa ka pisa hospital ba la pynmih na ka PMJAY-MHIS. Kane ka jaka ka kynthup ïa ki 6 tylli ki jingthiah NICU kiba don ïa ki jingdonkam kiba kham shalor (Ka jingpynhiar mynsiem kaba khlem da pynhiar bad pynhiar mynsiem, ka CPAP bad ka HFNC) bad ka jaka sumar kyrpang kaba don 10 tylli ki jingthiah ïa ki kmie bad ki khunlung ba dang kha.