Plie u Myntri Rangbah ia ka First Referral Unit ha Ranikor CHC

Syllad | The Rising MeghalayaJanuary 25, 2025

U Myntri Rangbah ka jylla u Conrad K Sangma ha ka 24 tarik Kyllalyngkot u la plie ia ka First Referral Unit (FRU) ba la kyntiew kyrdan hapoh Ranikor CHC, South West Khasi Hills ha ka jingdon lang ka Myntri ka Tnad ka Koit ka khiah ka Kong Ampareen Lyngdoh.

Ka jingkyntiew ia kane ka jaka aijingsumar kaba la dep shna pynbha ka kynthup ia ka Operation Theatre kaba treikam pura, ka labor room bad ki tiar ki tar kiba katkum kane ka juk kaba mynta na ka bynta ban pynlong ka jingwad bniah ha kaba iadei bad ki jait jingpang jingshitom bapher bapher.

Haba aijingkren ha ka jingialang u CM u la ong, “Kane ka dei ka khyllipmant kaba sngew sarong ia ka Jylla namar ngi la lah ban jam sha uwei pat u mawjam ba kongsan ban kyntiew ia ki lad aijingsumar ha ki thain nongkyndong.Kiba bun bah ki briew ki hap ban leit ha ka jingjngai kaba haduh san ne hynriew kynta na ka bynta ban ioh ia ki lad jingsumar, hynrei kane ka jaka aijingsumar mynta kan lah ban iarap ban weng ia ki jingeh bad ban iada ruh ia ka jingim briew.

Nalor kata u la pynpaw ruh ka jingsngew nguh ia ka Tnat ka koit ka khiah bad ia ki nongai jingsumar kiba hakhmat eh.

“Nga ai ka jingiaroh ia ki doktor bad ki nos ki jong ngi kiba la trei shitom ban aijingshakri sha ki paidbah ka Jylla hapdeng kiba bun ki jingeh. Ka jingkut jingmut kaba skhem ka jong ki ka long shisha kaba dei ban aijingiaroh,” u la ong.

Kane ka sienjam ka dei ka bynta jong ka jingpyrshang da ka sorkar jylla ban kyntiew ia ki lad aijingsumar bad ban pynthikna ba ka jingai jingshakri ha ka liang ka koit ka khiah dei ban pynioh sha baroh ki bynta jong ka Meghalaya.