Plie u Myntri Rangbah ia ka Integrated Command & Control Centre ha Umsawli

Syllad | The Rising MeghalayaNovember 20, 2024

U Myntri Rangbah ka jylla u Conrad K Sangma ha ka 20 tarik u Naiwieng u la plie paidbah ia ka Integrated Command & Control Centre ha Umsawli, Shillong ha ka jingiadon lang u Symbud Myntri Rangbah uba khmih ia ka Tnad Urban u Bah Sniawbhalang Dhar, u Chief Secretary Bah D P Wahlang, Director General of Police Kong Idashisha Nongrang, Commissioner & Secretary Urban Affairs Vijay Kumar bad u Commissioner & Secretary, Information Technology u Pravin Bakshi.

Haba kren ha ka jingialang u Myntri Rangbah u la ong ba ka Integrated Command and Control Centre (ICCC) ka dei ka jabieng jong ka Shillong Smart City baroh kawei. “Kane ka dei ka rynsan ka ban lah ban pyniasoh bad kiwei kiwei pat ki kam kiba iadei bad ka Information Technology bad ka long ruh ka Application Programming Interface (API) kaba long kham kyrpang  bad ka jinglah treikam jong ka ICCC ka long kaba iar bad kane ka Center kan long kum ka atiar ka ban iarap ban shim ia ki rai kiba dei bad ha ka por kaba biang,” u la ong.

Haba kren halor ka jingpyndonkam ia ka ICCC ha ka ban peitngor, ka jingkhmih ban tehlakam halor ki jingjia shah pynjulor ha ki bor mariang, ka jingsam ia ki jingtip bad jingpyniaid ba man ka sngi ia ka jaka sor, u Conrad u la ong, “Ka Technology ka long kaba bha katkum ka jingpyndonkam ia ka bad ka jingdon kane ka ICCC kam mut ba ngin lait na kino kino ki jingeh jingtyngjuh, hynrei ki jingtip ioh na kane ka ICCC bad ki jingpyndonkam ha ka ban shim ia ki rai bad ki sienjam kiba la shim kin wanrah ia ka jingkylla.” 

U Myntri Rangbah u la kyntu ia ki Tnad sorkar kum ka IT, Urban, Police bad Municipal ba kin pynkhreh noh ia ki kyndon treikam bad ki jingbthah khnang ba ki kor technology kiba la ioh mynta yn lah ban pyndonkam na ka bynta ban pynbha ia ka nongbah Shillong bad ban pynlong ia ka kum ka Smart City. U la pyntip ba ka sienjam kaba bud ka long ban thaw ia ka data center ha ka ICCC.

“Ka Meghalaya ka dei ban long ka Data Center Hub ym tang jong ka thain Shatei Lammihngi, hynrei jong ka Lammihngi hi baroh kawei namar ngi don ia ka lad ka kabu halor kane ka bynta bad pynpaw ruh ba ka sorkar ka la buh ia u optical fiber ha man la ki block bad ki district bad ia kaba yn pyniasoh bad ka ICCC.”

“Ngi dang trei borbah ruh ban pynthikna ba ngin lah ban pyniaid ia ki submarine cable ha Shillong bad ka thong ka jong ngi ka long ban pyniasoh ia man la ki block bad man la ki district ha ka rukom jong ka IT network kaba pura,” u la ong. U la ong ba ka ICCC kan pynkup bor na ka bynta ban wanrah ia ka jingai jingshakri ha ka rukom kaba kham biang namar kam dei tang ban ioh ia ka Smart City hynrei ruh ka Smart Governance.

Haba pynkut u la ong, “Ka nongbah ka lah ban long kaba shemphang tang lada baroh ki ai ka jingiatreilang ym tang ym tang ban pynlong ia ka Smart City hynrei ka nongbah kaba khraw.” “Ki jaka sor kum ka Tura bad ka Jowai ruh kin sa pyniasoh lang bad ka ICCC ha kine ki snem ki ban wan,” u la bynrap.

Ki bynta kiba kongsan jong ka ICCC Shillong ki kynthup ia ka ICCC platform, ICCC ryngkat ka monitoring workstation kaba don ia ka video wall 30 seater operator bad 20 tylli ki workstation, data center, collaboration solution and contact center, city network. Katba ki smart elements jong ka ICCC ki kynthup ia ka City Surveillance System ryngkat ka video Analytics, Solid Waste Management System, Intelligent Traffic Management System, City Wi-Fi, Public Address System, Emergency Call Box with Public Address System, Variable Message Display, Smart Pole bad Smart Street Lighting.