Plie u Myntri Rangbah ïa ka Police Reserve ha Baghmara

Syllad | The Rising MeghalayaJanuary 23, 2019

Baghmara: U Myntri Rangbah ka Jylla u Conrad K Sangma u la plie ïa ka Police Reserve ba thymmai ha ka sngi Balang ha Baghmara, South Garo Hills District.

Ha ka jingkren jong u, u la ong  ba ka jingroi ha ka ïoh ka kot ha ka imlang sahlang ka long kaba kongsan na ka bynta ban ïoh ia ka roi ka par kaba ïaineh. Ka jingtei ïa kane ka Police Reserve kan pynlong  ïa ki pulit ban ai ka jingshakri ba khambha shuh shuh ïa ka paidbah.

U la ong ruh ba ka South Garo Hills District ka long kawei na ki district ba wanrah ïa ka ioh ka kot ïa ka Jylla hynrei, kane ka District kam shym la ïoh ïa ki jingmyntoi ba pura na ka Jylla. U la kular ba ha ki sngi ki bnai ban wan un theh ia ki jingïarap na ka bynta ka roi ka par jong kane ka District.

Ha kajuh ka sngi la don ruh ka Review Meeting ha kaba ki ophisar bapher bapher jong ka District kila ïadonlang ban pyrkhat naka bynta ka jingeh ha ki tnat bapher bapher bad ki mawsiang ba ki ïatkauh ban wanrah ïaka roi ka par.

U Myntri rangbah u la leit jngoh ia ka Civil Hospital Baghmara bad ula ïohi da la ki jong ki khmat ia ki jingeh ba har rukom kiba haduh mynta ym pat lah ban pynbha.

Ha kane ka sngi kiba synranlang ïa u Myntri Rangbah ka Jylla ki kynthup ïa u Samuel Sangma MLA Baghmara,Rongara Siju MLA, U Chief Secretary, Addl. Chief Secretary , DGP, DIG Western Range bad ki MDC.