Plie u Myntri Rangbah ia ka Science Block bathymmai ha Sngap Syiem College, Mawkyrwat

Syllad | The Rising MeghalayaDecember 11, 2024

U Myntri Rangbah ka Jylla u Conrad K Sangma ha ka 10 tarik Nohprah u la plie ia ka Science Block bathymmai bad ka jingpynheh ia ka kamra klas ka Block B jong ka Sngap Syiem College ha Mawkyrwat, South West Khasi Hills District ha ka jingiadon lang u MLA ka thain u Bah Renikton Tongkhar bad u MDC u Bah Carnes Sohshang.

Ha ka jingkren, u Myntri Rangbah u la ban jur halor ka jingkongsan ha ki kam bei tyngka na ka bynta ki samla namar tang kumba 6 lak ngut ki briew ha ka Jylla ki dei kiba la palat ia ka 45 snem rta katba kiwei pat ki dei kiba dang kham khynnah.

U la kdew ruh kumno ba ka pule puthi ka don ia ka bynta kaba khraw na ka bynta ka roi ka par jong uwei pa uwei u briew bad ha kaba kut ka jingnoh synniang sha ka Jylla bad ka Ri. U la bynrap ruh ba ki kyrdan pule bapher bapher ki la ioh shibun ki jingmyntoi lyngba ki prokram bapher bapher jong ka sorkar.

“Ha jan baroh ki bynta jong ki kyrdan pule, ka sorkar ka la tuklar bad shim ia ki sienjam da kaba wanrah ia ki policy, ki prokram, ka jingkyrshan lyngba ki jingtei bad ha ka liang ka thungkam thungjam ia kaba nga sngewkmen ba ka college jong phi ruh ka dei bynta jong kane ka sngi,” u la ong.

Nalor kata u Myntri Rangbah u la pynbna ruh ia ka rai jong ka Kynhun Myntri ha ka jingialang kaba la long ha ka 9 tarik Nohprah ba yn sdang noh ia ka Science bad Commerce stream ha ki 5 tylli ki college sorkar ha ki bynta ka Jylla kiba kynthup ia ka Sohra, Mawphlang, Williamnagar, Baghmara bad Mahendraganj.

“Ka long ka bym hok ba ki samla pule kim lah ban jied ia ki sobjek kiba ki kwah ban pule, bad kumta ka dei ka kamram jong ngi ban pynthikna ba ngin lah ban ai ia ki lad ki kabu na ka bynta ki samla pule ba kin lah ban jied ia ki lain jingpule kumba la kdew da ka NEP,” u la ong.

Ha kajuh ka por u Myntri Rangbah u la pynbna ruh ban mang pisa na ka bynta ban thied ia ki bos skul bad noh synniang ruh T.20 lak na ka bynta ki kam ban kyntiew ha ki kam pynroi jong ka college.