Plie u Myntri Rangbah ia ka tnad kaba 25 jong ka HDFC Bank ha Tura

Syllad | The Rising MeghalayaMarch 30, 2025

U Myntri Rangbah ka Jylla u Conrad K Sangma ha ka 29 tarik Lber u la plie ia ka Tnad kaba 25 jong ka HDFC Ban ha Tura, West Garo Hills, ha ka jingiadon lang ka Agatha K Sangma MP barim, Abraham T Sangma Superintendent of Police ka West Garo Hills, CEO ka Tura Municipal Board u Rikse R Marak,u  Father Thomas John u Principal ka St. Mary’s School bad kiwei kiwei.

Haba kren ha ka jingialang, u CM u la ban jur halor ka jingdonkam ban pyniar ia ka jingtreikam jong ki bank ha ki thain nongkyndong bad ki khapsor jong ka Jylla. U la pyrto ruh ia ka HDFC Bank halor ka sienjam ban pynkhlain ia ka jingai jingshakri hapoh Rilum Garo bad pynpaw ia ka jingsngew skhem ba kane ka Tnad kaba thymmai kan noh synniang shibun na ka bynta ka ioh ka kot bad ka roi ka par jong ka thain.

U la pynpaw ruh halor ka jingdonkam ban don ia ki lad ban kham pynrung ia ki kam pisa tyngka bad kyntu ia ki bank ban pynsuk ruh ha ki kam ioh ram na ka bynta ki nongsengkam lajong, ki nongkhaii kiba rit, ki nongrep bad na ka bynta ki samla.U la ban jur halor ka jingdonkam ia ka jingnang jingtip kaba iadei bad ki kam pisa pilain ka ban pynkupbor ia ki nongshong shnong ba kin pyndonkam ia ki lad jingshakri lyngba ki bank bad kyntu ruh ia ki bank ba kin iatreilang bad ka sorkar ban kyntiew ia ki jingpynshai paidbah sha ki jaka kiba kyndong tam.

Nalor kata u Conrad u la kular ruh ia ka jingkyrshan kaba pura na ka liang ka sorkar Jylla ban weng ia ki jingeh kiba kum ki bank ki iakynduh ha ki jingtreikam ha ki thain nongkyndong jong ka Jylla.

Katba na ka liang ka Agatha K Sangma ha ka jingkren ka la ai khublei ia ka HDFC halor ka jingplie ia kane ka Tnad thymmai jong ka bad pynpaw ruh ka jingkyrmen ba kan iarap shibun ban kyntiew ia ka jingai jingshakri bad ka lad ioh kam ioh jam hapoh ka thain.

Kumjuh na ka liang u CP Marak- IFS Retd. Executive Chairman of MBOSE, ha ka jingkren u la pynpaw halor ka jingkongsan jong ki bank ban pynthikna halor ka jingshngain ha ka liang ka ioh ka kot bad u la kyntu ia ki paidbah ba kin pyndonkam ia ki lad kiba bun rukom lyngba ki bank ha ki kam kiba iadei bad ka pisa pilain.

Kiwei pat kiba la aijingkren ha kane ka sngi ki kynthup ia u Rikse R Marak, CEO ka Tura Municipal Board, bad la ioh ruh ka jingkyrkhu kyrdoh bad jingduwai na u Father Thomas John, Principal  ka St. Mary’s School.