Plie u Myntri Rangbah ia u mawnongrim ban tei noh ia ka Ropeway Project ha Shillong Peak

Syllad | The Rising MeghalayaDecember 4, 2024

U Myntri Rangbah ka jylla u Conrad K Sangma ha ka 4 tarik Nohprah u la plie ia u mawnongrim ban sdang tei noh ia ka Shillong Ropeway Project ia kaba la dep ban buh mawnongrim da ka President ka Ri India ka Droupadi Murmu ha ka 16 tarik u Kyllalyngkot mynta u snem ha ka jingiadon lang u Myntri ka Tnad Tourism u Bah Paul Lyngdoh.

Ia une u mawnongrim la plie paidbah ha ka jaka ban tei ia ka project ha Shillong Peak View Point.

Ha kane ka jingialang na ka liang u Myntri Rangbah bad u Myntri ka Tnad Tourism ki la aiti ruh ia ka “Letter of Acceptance” ne ka shithi ka jingpdiang sha ka KEC International Limited – Tantia Construction Limited JV ka ban sdang pyntrei noh shen ia kane ka project kaba kongsan kaba la mang ha ka jinglut ka ban kot T.175 klur.

Kane kan dei ka ropeway kaba nyngkong eh ha ka jylla Meghalaya ka ban kit ia ki nongleit nongwan ia kaba yn pyntreikam da ka jingiatreilang bad ka kompeni na France ka POMA ha kaba ka bynta jong kane ka kompeni ka long ban pynbiang ia ki tiar ki tar na ka bynta kane ka project.

Ka sorkar Jylla ka la shim ia ki sienjam ban shna shibun ki jingtei na ka bynta ban kyntiew ia ki kam jngohkai, bad kane ka ropeway project ruh ka dei kawei na kine ki bynta.

U Myntri Rangbah u la aiti ruh ia ka pisa kaba T.1.5 klur ha ka kylla kaba ar sha u Bah Glanding Lyngdoh, General Secretary ka Riat Laban Pyllun kaba long ruh shibynta jong ka jingai kaba T.3 klur ban siew ia ka bai jaka.

Haba kren ha kane ka jingialang u Myntri Rangbah u la pyrto ia baroh kiba don bynta ha ka kam halor ka jinglah ban pyndep ia ki jingthoh jingtar bad baroh ki jingdonkam khnang ban lah ban sdang pyntrei noh ia kane ka project.

“Ki la don shibun ki jingeh ba iakynduh, kata naduh ka jingshim jaka, ka jingioh jingbit bad halor ka jingthaw ia ka Ropeway Development Authority ban pynthikna na ka bynta ka jngshngain bad ka jingai laisen.Ka jingsdang ia ka project ka la seisoh hadien ka jingiaid pynkhreh kaba la shim por haduh saw snem,” u la ong.

Nalor kata u la pynpaw ruh ka jingsngewnguh ia ka Raid Laban Dorbar Shnong Pyllun halor ka jingai ia ka jingiatreilang. Kane ka project kan iaid lyngba ka Laban, Madan Laban, Upper Lumparing, Lower Lumparing, Lumkjatsngi, Oxford Hills bad Rngi Shillong. 

Haba kren halor ka jingiatreilang jong ki paidbah nongshong shnong halor katei ka project, u Conrad u la ong, “Ka long kaba kongsan bha ba ki paidbah kin iatreilang bad ka sorkar.Kane ka project ka dei kaba mih na ka jingiatreilang hapdeng baroh kiba ia don bynta. Kane ka project kan pynthikna ia ka jingioh lum khajna bad ka ban pynmyntoi ia ka Dorbar bad kiwei pat ki kynhun ba ia don bynta ha ka project.”

Nalor kata u la pyrto ruh ia ka ka tnad shipai khamtam ka Air Force kaba la ai ia ka jingiatreilang bad ka jingkyrshan na ka bynta ban sdang ia kane ka project. U pyntip ruh ba ka sorkar ka dang thaw ia kiwei pat ki lynti ban pyniasoh bad ka jaka jngohkai bad ban weng ia ka jingkhapngiah ha ka jaka hiar ka ropeway ha Madan Laban.

U Myntri Rangbah u la pyntip ruh ba ka sorkar kan shna da kawei pat ka lynti kaba jrong kumba 4 km ka ban pyniasoh sha ka surok ha 101 Area Upper Shillong. “Ka ropeway ka dei ka lad kaba biang tam ha ka leit ka wan ha ki jaka sor bad kan long ruh ka lad ban weng ia ka jingkhapngiah ia ka nongbah,” u la bynrap.

Kiwei pat kiba la ia don lang ha kane ka jingialang ki kynthup ia u Chairman ka Meghalaya Tourism Development Corporation, u Bah Sanbor Shullai, Chief Secretary, Bah DP Wahlang, Commissioner & Secretary Tourism, Dr. Vijay Kumar bad u Director ka Tnad Tourism u Bah Cyril V.D. Diengdoh.