Plie u Myntri Rangbah ka jylla ïa ka jaka saiñ ïa u Sohphan ha Rongara

Syllad | The Rising MeghalayaFebruary 8, 2024

U Myntri Rangbah ka jylla u Conrad K Sangma, haka 8 tarik Rymphang ula plie ïa ka jaka saiñ kiba bun ki jingbam na u Sohphan ha Gulpani Nokat, Rongara, South Garo Hills, ha ka jingdonlang jong u Myntri ka tnad pule puthi bad kiwei, uba dei ruh u MLA Rongara-Siju, u Rakkam A Sangma, u MLA, Baghmara bad u shongknor ka MGCC, u Kartush R Marak.

Kiwei kiba iadonlang ha kane ka sngi ki kynthup ïa u MLA ka Amlarem uba long ruh u Chief Advisor jong ka sorkar u Bah Lakhmen Rymbui bad kumjuh ruh bad u CEM, ka GHADC, u  Albinush Marak. 

Ha ka jingai jingkren ha katei ka sngi u Myntri Rangbah ka jylla u la ong ba u dap da ka jingsngewkmen kaba khraw halor ka jinglah ban plie ïa kane ka jaka saiñ ïa u Sohphan bad u la ong ba kum kine ki jaka saiñ jingbam kin ym kut satia tang hapoh u Sohphan, hynrei ka sorkar kan pyrshang ban plie kiwei ruh ki jaka saiñ na ka bynta ki jait soh bad ki jait jhur bapher bapher kiba mih ha ka jylla, namar kumba ka long mynta ki briew kim pat shym lah ïoh jingmyntoi satia na ki soh bad ki jhur kiba lah shu sepei na ka jingbym lah ban die ne bam.

“Ngi lah sdang kiba bunjait ki program halor ka mission mode khnang ba ki nongrep ki lah ban kamai arshah da kaba nangkyntiew shuh ka jingpynmih ki mar rep jong ki, kiwei de ki mat pyntreikam kiba kynthup kum ka Ginger Mission, Lakadong Mission bad Jackfruit Mission ki dei kiba lah plie ka lad kamai ïa ki paidbah ha ki jaka kyndong.

U la ïathuh ba ïa kane ka jaka saiñ Sohphan la shna ha ka jinglut kaba kot sha ka T.2 klur tyngka ryngkat ka bording 100 KW lyngba ka solar power unit bad kane ka dei kaba wanrah ka jingpynmih bording kaba khuid bad kaba neh slem. Kane ka jaka saiñ Sohphan ka dei kawei na ki jaka saiñ kaba kynsai tam ha ka jylla bad lah shna pynwandur kum kawei na ki jaka bajanai na ka jingkhmih jong ki Architecture bad ka long kawei na ki 15 tylli ki jingshna kiba kynsai ha ka pyrthei kumjuh ruh kane ka jaka ka dei kaba lah mang ruh ban pyndonkam kum ka dorbar shnong bad ka jaka sah jong ki briew lada wan lynshop ki jingshah pynjulor. Hadien kane u la ong ba ha ki aïom Sohphan kan don ka jingthied soh kaba kot kumba 1.5 lak haduh 2 lak u Sohphan manla ka sngi na ki riewpaidbah bad hadien kane yn sa saiñ ha ki jait jingbam bapher bapher kum u chip, ki flour, ka jam napdeng kiwei de. Kin don 150 ngut ki kynthei ki ban shah hikai bad trei ha kane ka tnad bad ka don ka jingthmu ban pyndonkam haduh 20 jait ki mar kiba mih na kane ka ri ha kane ka jjngsaiñ. ” Nga sngewkmen shibun ba ngi lah ïoh lypa kiba order na Russia bad Europe na ka bynta ki jingsaiñ ba mih na une u Sohphan bad kane ka dei kaba wanrah ka jingsngewsarong bad sngewkmen. Na ka bynta jongngi baroh”.

 U Myntri Rangbah ka jylla u la ong ruh ba kane ka unit ka dei ban khmih bad pynïaid da ka Rongara Agro Food Processing Cooperative Society ka dei kaba longtrai da ki paid nongshong shnong. “Ngi don ka thong ba kane ka jaka saiñ kan ai jingmyntoi ïa ki 5000 ngut ki nongrep bad plie ka lad ïohkam ïohjam na ka bynta ki samla kylleng ki jaka ka South Garo Hills,” la pynpaw u Myntri Rangbah.

U lah pyntip ruh ba mynta ki don 440 tylli ki Integrated Village Cooperative Societies bad 28 tylli ki Organic Farmer Producer Organisations bad 78.5 klur la theh pisa ha kaba ba ïadei bad ka rep ka riang. U la pynpaw ruh ba ka sorkar ka don jingmut ban tei thymmai ka jingim ki nongrep da kaba khmih thuh bha halor ka jinglah ban pynmih bun ki marrep bad ki jaka saiñ jingbam na ki marrep.

“Ki don haduh 160 tylli ki micro-processing ne ki jaka saiñ jingbam kiba rit, kynthup ki jaka saiñ ïa u sying, u Shynrai, u Kwai, Sohphan, ki jingsaiñ ki umphniang sma iwbih, u cashew, ki Sohmarit  bad ka Kait, kiba lah dep sdang.

Haba kren shuh shuh u Myntri Rangbah u la ong  ba ki don katto katne ki kam pynroi kiba lah sdang ha South Garo Hills kiba kham kongsan napdeng kine ki kynthup ka surok Ranikor-Rongara-Baghmara kaba lah jan dep arted, ki jingtei ha Baghmara bad ka jingwanrah ïa ka Science bad Commerce Streams ha Captain Williamson Sangma College, Baghmara kaba lah ban pynbiang ka jingdonkam ki samla ha  South Garo Hills.

U Myntri ka tnad pule puthi u Rakkam A Sangma ha ka jingkren jong u, u la ong ba ka jingshna ïa kane ka jaka saiñ kam shym dei kaba lah mang tang ïa u Sohphan hynrei kiwei ruh ki jaitsoh khnang ba kane ka lah ban kyntiew ka ïoh ka kot jong ki briew kane ka thaiñ. Ula kren bynñiaw ruh halor jingjur ka jingpep skul shiteng por jong ki khynnah ha kane ka district. Ula kyntu ïa ki kmie ki kpa bad ki khynnah ban shimkhia halor ka pule puthi. U la kdew ruh halor ka jingkotbor ka South Garo Hills ha ki jaka jngoh kai bad ka jjngdonkam ban shimkhia halor ka jingkner kti lang ha kane ka liang.