Plie u president ka Seng Khasi Kmie iaka jinglehkmen jubili ksiar ka Seng Khasi College

Syllad | The Rising MeghalayaAugust 30, 2022

Ka Seng Khasi College, Jaiaw, Shillong, kala plie iaka pyrda jong ka jingrakhe iaka jubili ksiar haka jingialang kaba long ha hall jong ka kolej Sngi U Blei.

Kongsan ba la leit ban plie ia ka pyrda jong kane ka jingrakhe dei u President ka Seng Khasi Kmie u Rgh Don Kupar Dkhar (IAS Rtd) ryngkat ka jingiadon lang ki lai ngut ki vice president ka Jylli Pyrkhat Kam (JPK) ka Seng Khasi Kmie ba kynthup ia u Rgh O. Pyngrope, Rgh Wallamphang Roy, Rgh Arwas S Tariang, nangta u President bad Secretary ka Gorvening Body u Rgh Banteilang S Rumnong, Rgh Richard H. Dkhar, ki Principal barim, ki nonnghikai, ki samla pule bad kiwei kiwei.

Ban sot na ka jingkren ka jong u Rgh D.K Dkhar, ka khana lyngot jong kane ka kolej, ka long ba la seng ia kane ka kolej ha ka 28 tarik u nai Nailar jong u snem 1973, ha Hall jong ka iing Seng Khasi ba mynta ha Mawkhar tang kum ka kolej miet ne ka evening college.

Ha kaba sdang la don shwa tang kumba 34 ngut ki samla pule bad dei ha u nai Risaw jong u snem 1973 ba la shah ne ai jingbit ban sdang ia ka Pre University Classes bad dei tad ha u snem 1987 ba  la ioh ia katta ka jingithuh kaba pura ne ka permanent affiliation na ka skul bah  pule North Eastern  Hill University bad dei ha u snem 1983 ba la kynriah noh pat ia ka sha ka jaka ba ka don mynta, katta ha lympung Weiking, Jaiaw, Shillong.

Haba phai pat sha ki nongseng la sngewthuh ba ki riew khraw jabieng ka Seng Khasi kiba la shimti ban bat kum ki nongialam ban sdang ia kane ka kolej ki long kum ki jong u Rgh A.S Khongphai, u Rgh R.T Rymbai, Rgh Rubi Diengdoh (bam kwai ha dwar U Blei) kiba long kum ki President ki Secretary ba nyngkong ka kolej ryngkat bad kiwei kiwei ki dkhot, kiba la trei khlem shongthait ban seng ia kane ka kolej, kaba da kylla mynta kane ka kolej kynjreng ka la ieng bad kam mynta sha u mawmer ba 49 bad satang shi snem nangne shakhmat kan rakhe ia  u mawmer ka 50 tylli ki snem, bad mynta ka  kolej ka don  ia ka Atrs bad ka Commerce Course naka bynta ka Class XI & XII bad ka Honour Course naka bynta ka Arts.

Kawei na ka thong kaba ki riew Rangbah ka Seng Khasi haba ki seng ia kaneka kolej, ka long ba kin lah ha kaban iarap ban ai lem ia katta ka jingnang jingstad ha ka jingsiew kaba tad, kum shi bynta ban lah ban ialam ne ban btin lynti ia ki khun samla, kiba wwan na ki nongkyndong, hynrei kiba thrang bad sliang ban kiew irat ha ka jingim ka jong ki, kaba kane ka thong haduh mynta mynne ka long kum u saihon, uba dang iai rhem ne ba la iai bteng ban leh ia kane.

Ha shwa ban sdang ka jingialang la ioh shwa ia ka nguh ka dem kaba la ai da u Riew Tymmen Riew San ka Seng Khasi Kmie u Rgh Hambok Kharmawphlang bynrap da ka jingkyntiew iaka lama ka kolej da u kongsan u Rgh Don Kupar Dkhar.

Hadien kane, la poi pat sha ka jingialang ba kongsan ba la pynlong hapoh ka hall jong ka kolej ha kaba la ioh ia ka kyntien pdiang sngewbha na u bah Wandur. B Rynjah Principal, ki jingkren na u Preisdent bad Secretary ka Governing Body u Rgh B.S Rumnong bad Rgh Richard H Dkhar, ka jingthang ia ki mombati kum ka dak ka jingplie ia ka pyrda jong ka jingkhreh ban rakhe ia ka jubili ksiar ba la lam khmat da u kongsan bad kiwei kiwei ki riew pawkhmat bad kumjuh ki Principal brim bad ba la shogthait ka kolej, ki sur jingrwai ba la ai da ki khynnah pule, nangta ka shlem ai jinghikai ia ki sur tynrai bad kumjuh da ki khynnah pule  barim  bad ia ki kyntien ai khublei la ioh na  Vice Principal I kong Herina Dohtdong bad ha kane ka sngi, u kongsan u la leit ban khap artad ia u ribbon kum ka dak jingplie ia ka shlem kilan met ne ka gym.

Kum u nongialam ba Rangbah ka Seng Khasi Kmie, u Rgh Don Kupar Dkhar, um lah ban khlem da dap d a ka mynsiem kaba kmen bad  kaba phuhmat ba ha kine ki 49 tylli ki snem ka jingseng ia kane ka kolej, ka la sdang ba kan roi ha kiba bun ki liang kum ha ka liang ka jingdon ia ka Computerised Library, ka Floodlit basketball, ka shlem kilan met, ka jaka ban ia bam ne dih sha (canteen)  bad kaba kham sngewtynnad ka long ka jingsdang ban kham bun ki khynnah ne ki samla pule, kiba la kynjoh da ki hajar ngut.

Kumta na ka liang u Rgh Don Kupar u shim ia ka kabu ban ai khublei ia u Principal nangta ia ki nonghikai bad kumjuh ia ki nongtrei khamtam eh ia u President bad Secretary ka Governing Bocy, kiba la shim ha ki ia ka lyngkor kaba khiah na kiba khia tam ban kit ban bah ia ki kam ba man la ka sngi jong kane ka kolej.