Plie u president Seiñraij iaka jaka lehniam Knia Pyrthat

Syllad | The Rising MeghalayaJuly 1, 2022

U President ka Seinraij Jowai u Ma OR Shallam ula plie paidbah ïaka madan “Kñia Pyrthat” kaba don ha Pohhali Dulong, West Jaintia Hills District haka sngi Thohdieng.

U Dolloi ka Elaka Jowai Ma Puramon Kynjing ula suit ka shor ia kine ki jingtei kyntang ka Seinraij Jowai haka jingdonlang ki nongialam ki ki Soo Langdoh, ki dkhot ka Executive Committee jong ka Seinraij Jowai, ki waheh shnong bad kiwei kiwei.

Kane ka jaka Knia Pyrthat ka dei kaba ki Soo Langdoh ki iakynduh lang manla u snem ban pyndep iaka jingleh niam bad ka nguh ka dem shuwa ban sdang ka Behdieñkhlam. Mynta ka kynti ka Behdieñkhlam Jowai kan sdang naduh 11 tarik haduh 14 tarik Naitung.

Ki Soo Langdoh ki kynthup iaka Langdoh Jowai, Langdoh Kongwasan Chyrmang, Langdoh Ialong bad Langdoh Tuber.

U General secretary Seiñraij Jowai u Ma Arwotki Sumer ula ïathuh ba ïaka madan Kñia Pyrthat la tei haka jinglut kaba T. 35 lakh kaba la sei na ka iarong pisa ka Seinraij Jowai.

Ula ïathuh ba jingthmu ban tei ia kane ka jaka kyntang kala sdang naduh 2014 hynrei namar ka jingduna pisa ym lah ban tei, hynrei dei ha u snem 2021 la khot tender bad la sdang iaka jingtei kaba la dep ruh haka por ka biang.

Haba kren ha kane ka jingialang plie u Ma OR Shallam, ula ong kadei ka sngi sah kynmaw ïaki dkhot ka executive committee kiba mynta kumjuh ïaki khun ka Niamtre jong ka Seiñraij Jowai kiba la synñiang ban tei ia kane ka jingtei kaba kyntang.

Ula ai khublei iaki nongialam barim kiba la maitphang ban sdang iaka jingtei, pynban wat hadien ba kila leit tied na kawei ka jingkhang sha kawei jingkhang ka sorkar, khamtam ka tnad Arts and Culture pynban kim ioh wat tang shinaia bad kane ka kam kala sahteng bun bun snem.

Ula kyntu ïaki nongshong shnong ka Pohhali Dulong bad ki khun ka Niamtre ban sumar ïa kane ka jingtei khnang ban tyngkai iaka jinglong kyntang kane ka jaka niam khnang ban pynneh pynsah iaka riti ka dustur bad ka niam ka rukom.

Kiwei de kiba la ai jingkren ki kynthup ia u nongialam barim ka Seinraij Jowai u Ma SK Lato, u Ma Hambiness Passah vice president of Seinraij Jowai, katba iaka jingialang la pyniaid da u ma Hercules Toi.