Plie u Principal ka North Liberty HSS ïaka school Rising Hills English School ha Mowtyrshiah

Syllad | The Rising MeghalayaMarch 4, 2020

U Principal jong ka North Liberty Higher Secondary School, Jowai, u B Richard Uriah ula plie paidbah ïaka skul Rising Hills English School haka shnong Mowtyrshiah haka 29 tarik u bnai bala dep.

Kane ka skul ka dei kaba dang shu seng thymmai bad yn sdang shuwa haka klas Tiny Tots haduh Class I ha une u snem.

U B Richard Uriah haba kren kum u kongsan ula pynpaw ba u kloi ban ïarap naka bynta ban kyntiew bad ban pynïaid shakhmat ïa kane ka skul bad ula ong ba u kloi ban ai jinghikai pyntbit ïaki nonghikai kane ka skul bad ban ïarap pynbha shuh shuh ïaka skul da kaba pynïoh ïaka jinghikai computer iaki khynnah ban pynbha iaka pule ka puthi ha katei ka thain.

U Chairman ka skul, ma Winning G Sungoh, ula ong baka jingthmu ban sdang ïa kane ka skul phareng ha kane ka shnong kadei ban ki khynnah kin ïoh ka jingnang jingstad hala shnong bad kim hap ban leit sha ki jaka sor ban ïoh ïaka jingpule haka ktien phareng.

“Ka SMC ka iarap ïaki khynnah kiba wan na kiba longing ba duk bad kan pynduna ïaka bai skul bad katba lah ngin ai ka jinghikai kaba bha tam kaba iadei bad ka juk shai mynta,” la ong u Winning Garland Sungoh bad u kyrmen ba da ka jingïatreilang u babu Richard kane ka skul kan iaid shakhmat.

Kiwei kiwei kiba kren ki kynthup ïa u Habahun Dkhar MDC Sahshniang, Waheh Shnong Mowtyrshiah Hamly Dkhar, Secretary SMC Goldwin Shadap, u Waheh Shnong Mowtyrshiah A u Hamly Dkhar, u Pastor Arkilang Shadap uba pynïaid ïaka jingïalang plie ia kane ka skul.