Plie u Wailadmiki iaka jingrakhe dap 50 snem ka Govt. Girls HSS, Jowai

Syllad | The Rising MeghalayaMarch 21, 2025

U MLA ka Jowai Ma Wailadmiki Shylla haka 20 tarik Lber ula plie paidbah iaka jingrakhe Jubili Ksiar (Golden Jubilee) jong ka Government Girl’s Higher Secondary School haka jingialang kaba long ha madan Jrisalein, Chutwakhu Jowai

Haba kren haka jingialang Wailadmiki Shylla ula ong ki khynnah skul kane ka thain ki dei kiab donbok namar ha kiwei pat ki bynta jong ka pyrthei ne wat ha ka ri India ruh ki don bun ki jaka kiba dang ialeh ban ioh iaka jingpule jong ki khynnah kynthei, hynrei hangne ngi rakhe ia ka jingdap 50 snem jong ka Govt. Girl’s HSS.

Ula pynpaw ka jingkmen ba wat hapdeng ki jingeh bapher bapher, hynrei ki nongshong shnong ki shaniah haki jaka pule sorkar, bad halor kane ula ai khublei kyrpang ia baroh ki nonghikai kiba la aiti lut ialade ban ai iaka jinghikai kaba bha ia ki khynnah.

Haba iadei bad ki jingeh hapoh ka tnad pule puthi, u MLA ula ong kam shym la long kaba suk ia kane ka sorkar namar haka por ba ka shimti haka bor ha u snem 2018 ka tnad pule puthi ka don haka jingeh namar lada nujor bad kiwei ki jylla jong ka thain shatei lammihngi, ka Meghalaya ka don haduh 15 hajar tylli ki skul bad ka sorkar ka shimkhia ban trei bha na bynta baroh ki skul.

U Ma Wailadmiki Shylla ula pynkynmaw ruh haka jingialang ba haka dorbar mang tyngka kaba dang shu dep, ula kren halor ka jingbymtreikam shuh ka hostel jong ka Govt. Girls’ HSS kaba long kaba donkam bha khamtam eh iaki khynnah kynthei kiba wan na ki jaka nongkyndong da kaba u pynthikna ruh ba ha kine ki sngi ban wan kane ka hostel kan treikam noh.

Shuh shuh ula pyntip ruh ba ula rah iaka mat hapoh ka iingdorbar na ka bynta ban pynheh iaka Kiang Nangbah Government College ban pynkylluid iaki kamra klas.

Ula kyntu ruh iaki khynnah kynthei kiba la pyndep iaka Eksam SSLC ban shim kabu iaka Chief Minister Scholarship Scheme kaba 8000 tyngka shisnem.

Nalorkata ula pyntip ruh ba ula dep ban iakren bad CM bad la ioh ruh iaka mang tyngka naka bynta ban tei iaka Working Women’s Hostel hapoh ka District haka jaka ka MTC kaba don mar pyrshah bad ka Kiang Nangbah Government College.

Ka Kong AP Syiem Joint Director of School Education & Literacy bad Incharge DSEO West Jaintia Hills District haka jingkren kala ong, ka Jubilee ka dei ka por jong ka jinglehkmen bad kadei ruh ka por ban kynmaw ia ki jingjop bad ki jingeh kiba iakynduh lyngba ki 50 tylli ki snem kiba la leit noh bad mynta ka sngi kadei ka sngi ban shim ia ka rai kumno ban leh khambha shuh shuh lyngba ka jingiatreilang jong ki khynnah skul, ki kmie ki kpa bad kumjuh ruh ka shnong ka thaw hi baroh kawei.

Hashwa kane la ioh ka jingkren pdiang na ka Vice Principal ka Kong Valency Lamare katba ka Principal ka Dr. Wa-i-sa Sumer kala kren halor ka histori jong ka jngiaid lynti jong ka skul naduh ba la seng iaka ha u snem 1975 kumjuh ka Dr. EA Paswet kaba Pass nyngkong eh iaka eksam SSLC ha kane ka skul.

Hashwa kane u Wailadmiki Shylla ula plie iaka building bathymmai jong ka Commerce Stream kaba u kyrmen skem ba kan long ka jingkyrkhu ia ka skul bad khamtam eh ia ki khynnah skul.

La pynphuh pynphieng ïaka jingrakhe da ki jingrwai bad ki jingshad na ki khynnah skul bad na ki pass pupil bad la sam ruh iaki jingai sngewbha sha baroh ki nonghikai barim.