Plie u Wailadmiki Shylla iaka football league ka Thadlaskein Sports Association

Syllad | The Rising MeghalayaDecember 10, 2024

U MLA ka Jowai Ma Wailadmiki Shylla haka 10 tarik Nohprah ula plie iaka lympung ialehkai ‘Thadlaskein Football Leuge 2024-25’ ba la pyniaid da ka Thadlaskein Sports Association (TSA) kawei na ki synjuk ialehkai hapoh ka Rilum Jaintia kaba la pynkhie im hadien bun tylli ki snem ba ka duh iaka jingiathuh na ka Meghalaya Football Association (MFA) ha u snem 2019.

Dei hadien ba shimkhia ki nongshong shnong bad ki riew ieid football kila shim iaka sienjam ban thaw iaka adhoc body bad da ka jingiasoh ki 31 tylli ki sports club hapoh ka TSA, ka MFA kala rai ban weng sospon ha u bnai Risaw, 2024.

Kumta khlem pynslem ha kane ka kynti ka TSA kala khot pynlong iaka Football League bad ki don haduh 58 tylli kiba wan ban iashimbynta. Ia Iaka jingialehkai la pynlong ha Wahiajer Stadium.

Nalor u MLA, la donlang ruh u MDC JHADC Ma Lakhon Dkhar, District Sports Officer (DSO), West Jaintia Hills Ma Khroobok Passah, ki nongialam bad dkhot nongkitkam ka TSA ba kynthup naduh u President Ma Kmenlang Shylla, Vice President Ebris Pariat bad Mutshwa Thabah, General Secretary Ebormi Lyngdoh nalor kiwei kiwei.

U Ma Wailadmiki Shylla haka jingkren u pynpaw ka jingkmen namar da ka jingkhie im biang ka Thadlaskein Sports Association (TSA) ki Club hapoh ka thain kum ka Mukhla, Ummulong bad kiwei kin lait naka jingkut lad bad duh jingkyrmen.

Ula bynrap ruh ba ki don ki Club na kane ka thain kiba bit ba biang ki pyniaisoh ialade bad ka West Jaintia District Sports Association (WJDSA), hynrei kam long pat kaba suk iaki ban kiew shaduh Jowai namar ka ktah iaka ioh ka kot jong ka shnong ka thaw.

U MLA ula kyntu ruh iaki rangialehkai ban trei shitom namar ka jingialehkai phutbol ha kine ki sngi kadei ka lad kamai ialade bad ka sorkar jylla ruh kala pyrshang ban kyntiew iaka kam ialehkai hapoh ka jylla khnang ban ioh jingiarap ki khun samla bad rang ialehkai ka Jylla.

Nalor ka jingiarap pisa na u MLA ka thain bad Symbud Myntri rangbah Ma Sniawbhalang Dhar kaba 1 lak tyngka shaka kynhun lahduh, u Ma Wailadmiki Shylla ruh ula pynbna ban iarap pisa 50 hajar tyngka shaka kynhun kaba wan ba ar.

Kum ka dak ka jingsdang iaka lympung u MLA ula pynher iaka lama ka TSA.

Haba phai shaka jingialehkai jong ka sngi sdang, ka Jalapang kala pynrem kput haduh 9-0 pyrshah ika Takhniang SC. Ha kane ka jingiakhun la mih paw ar tylli ki hattrick lyngba u Lumlangki Phawa (17 P, 40, 75) bad Eladmi Lyngdoh (44,47, 73).