PM Poshan Scheme: Ka jingpyndap bam ha ki tiphin thylli jong ki khynnah skul

Syllad | The Rising MeghalayaJune 23, 2024

Ka PM Poshan Scheme ba la tip kham hashwa kum ka Mid-Day Meal Scheme ka dei ka prokram kaba iadei bad ka jingpynioh ia ka jingbam sngi sha ki khynnah skul ia kaba la bei tyngka da ka Sorkar India bad kaba thmu ban pynioh ia ki jingbam ba tei sha baroh ki khynnah skul hapoh ka ri.

Watla kane ka skhim ka pynioh ruh ia ki tiar ki tar bad baroh ki jingdonkam kiba iadei bad ka jingai bam kaba shisien shi sngi na ka bynta iwei pa iwei i khynnah, mynta ki khynnah skul ki lah ban rah ia ki tiphin bathylli na la ki jong ki iing ki sem ha ka jaka ban sam ia ka bam ha ki pliang ba la pynioh da ki bor pyniaid skul.

Kane ka jingpyrshang kaba biang eh ban pyndonkam da ki tiphin ka dei ka sienjam ba la kham pyndonkam ha kiba bun ki skul ha ka jylla Meghalaya, kata ka jingpynioh ia kane ka jingbam shiteng sngi lyngba ka PM Poshan Scheme. Kane ka sienjam la sakhi ba ka la long kaba seisoh ha kaba pyntreikam ia kane ka skhim.

Lyngba kane ka sienjam kaba thymmai, ki khynnah skul kiba dei ban ioh ia kane ka jingbam sngi ki lah ban shu wanrah beit ia ki tiphin thylli na la ki jong ki iing ki sem bad ai sha ki nongshet bad nongiarap ha ka por mynstep bad ban leit bteng ban shong sha la ki jong ki klas.

Na ka laing ki nongshet kin iarap ban nang pynsong ia ka bam ha kine ki tiphin hadien ba la dep ban pynkhreh.Hadien ba la song ia baroh ka bam na ka bynta ki khynnah katkum ki kyndon ba la buh da ka sorkar India, kata kaba long 100 gram ki jingbam ba tei na ka bynta iwei pa iwei i khynnah Primary bad 150 gram na ka bynta ki Upper Primary ha ka shi sngi ha ryngkat bad ki jhur, shana bad kiwei pat.

Hadien ki khynnah kin sa ioh pdiang ia kine ki tiphin ba la pyndap jong ki bad ban bam ia ki jingbam ba la dep pynkhreh.Hadien ki khynnah ki lah ban rah biang ia ki tiphin thylli sha la iing hadien ba la wai skul.

Kane ka sienjam kan iarap ruh ban pynduna ha kaba iadei bad ka jingdonkam um ban sait ia ki pliang, kan iarap ban pynneh ia ka jingkhuid bad pynkloi ban pynbiang ia ka bam.

Na ka liang ka DSEL ruh ka pynshlur ia ki khynnah skul bad kiba don bynta ha baroh ka jylla ba kin pyntreikam ia kane ka sienjam kum ka kabu ban kyntiew halor ka jinglah ban pyntreikam bha ia kane ka scheme.