Poi 85.58% ki nongthep vote ha JHADC 76.77% ha KHADC, duna ba wan thep vote ha Nongthymmai & Jowai North

Syllad | The Rising MeghalayaFebruary 22, 2025

Ka Jaintia Hills Autonomous District Council (JHADC) ka la sakhi ia ka jingwan poi jong ki nongthep vote kaba kot 85.58 percent hadien ba la pynlong biang ia ka jingiathep vote ha ki sawtylli ki polling station jong ki artylli ki constituency hapoh East Jaintia Hills haka 22 tarik Rymphang, katba ka jingdon jong baroh ki nongwan thep vote ha Hills Autonomous District Council (KHADC) ka long 76.77 percent.

Ka elekshon sha ki 58 tylli ki District Council constituency, kata mar 29 ha KHADC bad JHADC ka la kut noh ha ka 21 tarik Rymphang.

Hapoh JHADC, ka Sumer constituency ka dei kaba don bun tam ki nongwan thep vote, kata haduh 91.46 percent katba ka Jowai North ka dei kaba duna tam, kata 75.28 percent.

Ka Maskut polling station kaba hap hapoh Moodymmai-Nongkhroh constituency ka dei kaba la sakhi ia ka jingwan poi bun eh ki nongthep vote, kata haduh 99.52 percent bad kaba wan duna tam ka dei ka Khaddum polling station kaba hap hapoh Saipung-Nongkhlieh constituency kaba long tang 51.34 percent.

Katba ka Tangnub polling station kaba hap hapoh Saipung-Nongkhlieh constituency kaba ym don mano mano ba wan thep vote. Baroh ka vote ka don 399.

Ka jingpynlong biang ia katei ka jingiathep vote ha kitei ki artylli ki constituency ka East Jaintia Hills ka la long kaba iaid beit iaid ryntih hapdeng ka jingpynkhlain ia ki bor pahara.

Katba ha KHADC ka Nongspung-Sohiong constituency ha East Khasi Hills ka la sakhi ia ka jingdon bun eh ki nongwan thep vote, kata da 86.14 percent, katba ka Nongthymmai constituency ka dei kaba duna tam da 59.75 percent.

Ka jaka thep vote kaba bun tam ki nongthep vote ka dei ha Maw-Ah hapoh ka Langkyrdem-Laitkroh kata da 96.99 percent bad ka jaka kaba duna tam ki nongthep vote ka dei ha Madanrting Thembasuk Rum A hapoh Nongthymmai kaba don 4.49%.

Na ki 272 ngut ki kyrtong, 158 ngut kynthup ia 12 ngut ki kynthei kiba iakhun 29 tylli ki constituency jong ka KHADC bad 114 ngut kynthup 7 ngut ki kynthei na ki 29 tylli ki constituency jong ka JHADC.

Baroh ki nongthep vote kin don 13,08,818 ngut ha baroh ar tylli ki KHADC bad JHADC kynthup iaki  6,32,347 ngut ki shynrang bad 6,76,467 ngut ki kynthei.

Ka KHADC ka don baroh 9,96,518 ngut ki nongthep vote na kine 4,81,268 ngut ki shynrang bad 5,15,247 ngut ki kynthei.

Ka JHADC kaba kham duna ki nongthep vote bad baroh kalong 3,12,300 ngut kynthup ia 1,51,079 ngut ki shynrang bad 1,61,220 ngut ki kynthei.

Katba ka jingniew ia ki vote kan long ha ka 24 tarik u February.