Poi haduh 90.84% ki nongthep vote ha ka bye-election ha Gambegre

Syllad | The Rising MeghalayaNovember 14, 2024

Ka jingiathep vote na ka bynta ka elekshon shiteng samoi ha Gambegre ha ka 13 tarik u Naiwieng ka la long kaba iaid beit iaid ryntih ha kaba ka jingdon jong ki paidbah nong wan thep vote ka la kot haduh 90.84 percent, ong u Chief Electoral Officer (CEO) u BDR Tiwari.

Haba kren sha ki lad pathai khubor u CEO u la pyntip ruh ba ha ka elekshon MLA 2023, ka jingpoi jong ki nongthep vote ha kane ka constituency ka long haduh 90%.

U la ong ba na ki 33,088 ngut ki nongthep vote 16207 ngut ki dei ki kynthei bad 16881 ngut ki shynrang kiba la pyndep ia la ki jong ki hok ha kane ka jingiathep vote kaba la sdang naduh ka por 7 baje mynstep hasduh ka por 6 baje janmiet ha baroh ki 51 tylli ki Polling Station.

Ka Sanjengpara polling station ka dei kaba bun tam ki nongwan thep vote, kata kaba la kot haduh 95.60%.

U CEO u pyntip ruh ba ha ka mock poll ba la long ha ka por mynstep, la bujli ia kawei ka VVPAT bad hadien ba la sdang ka jingiathep vote, 3 tylli ki BU, 3 ki CU bad 6 tylli ki VVPAT la hap ban bujli ha ki santylli ki Polling station.

Baroh ki don hynriew ngut ki kyrtong kiba iakhun ha kane ka bye election, kata kaba kynthup ia ka kurim u Myntri Rangbah Conrad K Sangma ka Dr Mehtab Chandee A Sangma kum ka kyrtong na ka party synshar National People’s Party (NPP), u Jingjang M Marak ka Seng Congress, ka Sadhiarani Sangma na ka AITC bad u Bernard N Marak jong ka BJP. Katba ki arngut ki dei ki kyrtong shimet kiba kynthup ia u Sengkrabirth M Marak bad Jerry A Sangma.

Ia kane ka bye-election la hap ban pynlong namar ka jingiehnoh kam jong u nongialam ka Congress u Saleng A Sangma hadin ba u la shah jied kum u MP ka Tura.

Ha kajuh ka por, ki bor jong ka ain ki la ioh ban kurup ia ki mar ki mata kiba kot sha ka T.12.72 lak haduh ka sngi thep vote, bad na kane T. 179621 ka dei ka pisa bad T. 2.099 lak ka kyiad, T. 2.40 lak u droks bad T. 5.4248. ki jingai sngewbha, ong u CEO.