Poi hospital haduh palat 80 ngut ba ioh bih na u shana khleh ha Adokgre, North Garo Hills

Syllad | The Rising MeghalayaOctober 13, 2024

Haduh palat 80 ngut ki briew la pynthikna ba ki la ngat bih na kaba bam ia u shana khleh ha Adokgre, North Garo Hills ia kiba la hap ban pynkit noh mardor shapoh ka hospital.

Katkum ki khubor la iathuh ba ha ka 9 tarik u Risaw ka la don ka jingialehkai phutbol ha Chenangre Stadium, Adokgre ha kaba ki paidbah na ki thain ba marjan ki la wan sakhi ia kane ka jingialehkai hynrei hadien ba ki la kem noh noh na kaba bam ia u shana khleh ba la sniew ba la die ha kane ka jaka.

Hadien kane ka jingjia la ong ba la pynkynriah noh mardor ia kine ki briew shapoh Adokgre PHC namar ka jingshitom jur, ha kaba ia 6 ngut na ki la hap ban pynkynriah noh sha Guwahati bad Goalpara hospital na ka bynta ban ioh ia ka jingsumar kaba kham biang.

Ha kajuh ka por, ki khubor ba la ioh lum na ki lad jingsumar ki la pynpaw ba kine ki briew kiba la ngat ha ki jingshitom ki la lait na ka jingma jong ka jingim.

Ha kaba iadei bad kane ka jingjia la pynlong ia ka jingtohkit da ki bor pyniaid district ka North Garo Hills. Nalor kata la shim nuksa ruh ia ka jingbam ia kaba la phah sha Shillong na ka bynta ban leh ia ki test.

Mynta ki bor sorkar ki dang ap ia ka kaiphot jingtohkit bad ia ka jinglap na ka jingleh ia ki test.