Poi u Sohniamtra na Jylla ha Dubai ha iew LuLu Hypermarket

Syllad | The Rising MeghalayaDecember 13, 2023

U Sohniamtra na Jylla (Khasi Mandarin) haka 12 tarik Nohprah ula poi ha iew Dubai bad mynta la die ia u ha LuLu Hypermarket ha Al Qusais bad Al Barsha. Une u Sohniamtra ba poi nyngkong sha Dubai udei uba 1.5 Metric Ton na ka 20 Metric Ton.

Une u Sohniamtra u dei uba pynmih na Ri Bhoi, East Garo hills bad South Garo Hills.

Ka Myntri Agriculture and Farmers’ Welfare, Dr. Mazel Ampareen Lyngdoh haka 11 tarik Nohprah kala pyllait paidbah ia u Sohniamtra ban shalan sha Dubai haka jingialang kaba long ha Integrated Agriculture Training Centre (I.A.T.C), Upper Shillong haka jingiadonlang u Bah RV Lyngdoh, MLA, Mylliem Constituency bad kiwei kiwei ki heh ophisar ka tnad kamrep ka Jylla. Nalor kata la iadonlang ki nogmihkhmat na ka APEDA, Lulu Group kiba shalan ia u Sohniamtra sha katei ka ri.

Ka Myntri kala ong ba hadien ka jingpyrshang kaba tang 1.5 MT-2 MT mynta la lah ban shalan 20 MT bad kane hi ka pynpaw iaka jingjop ka kam shalan sha ba ri. Kane ka sienjam ka pynthikna ba ki nongrep bad ka sorkar kan kiew bad myntoilang. Kawei pat ka thong ka long ban kyntiew shuh shuh iaka jingrep ba khlem dawai (organic farming) ban pynrung haka ki paid nongrep khnang ban kiew rasong ka kam rep kam riang, la ong ka Kong Ampareen.