Pom dusmon ka tnad kam khlaw iaki dieng ki siej bad u tympew ha ki jaka rep ki Khasi ha Assam

Syllad | The Rising MeghalayaJuly 8, 2021

Ka taiew nyngkong jong u bnai Naitung kadei ka tamasa jong ka kam khlaw ban thung dieng bad ban ialap iaka jingpynneh pynsah iaki dieng ki siej bad ban iada iaka mariang, phewse kawei ka shnong Khasi ha Assam kala mad iaka jingsngewsih ha kaba ka tnad ka kam khlaw kala wan ban thombor bad pom dusmon iaki dieng ki siej, ki tympew haka jaka rep ka jong ki bad kynnoh ba ki dei ki nongkyntur pud.

Kane ka jingjia kala jia haka 6 tarik une u bnai haka shnong Dosdewa, kaba hap ha Karimganj District, Assam.

Halor kane ki nongshong shnong ka Dosdewa kila pynrem jur iaka tnad kam khlaw halor ka jingwan thombor jong ka bad pom dusmon ia ki dieng ki siej bad ia u tympew kiba dei ki lad kamai jakpoh jong ki.

U Comely S Gassah, uwei na ki nongshong shnong ula ong ba kane ka jingleh jong ka tnad kam khlaw ka Assam ka dei ka jingiuhroit iaka ka hok ki Khasi ba shong ba sah ha katei ka shnong namar ba ki biang lut ki kot ki sla bad kim dei satia kita ki nongkyntur pud kumba la kynnoh.

Ula ong ba ka tnad kam khlaw ka Assam kam nud ban pynshitom ia kiba ka dei ban pynshitom bad kyntur ia u pud ka tnad kam khlaw ka Assam, pynban ia ki Khasi kiba ri sumar iaki khlaw ki btab kala thombor bad pynjulor lut ia baroh ki marrep bad ki dieng ki siej kiba kila ri sumar da bun bun snem.

U ma Comely lyngba ka facebook ula kyntu ia u myntri rangbah ka Assam bad ka sorkar ban kan shimkhia ban tuklar bad ban pynioh iaka hok jong ki nongshong shnong ka Dosdewa.

Shuh shuh Barak Valley Khasi Jaintia Welfare Organisation (BVKJWO), ka KSU-BVC kila hiar sha katei ka shnong bad kila lap ba baroh ki marrep jong ki saw tylli ki longiing kila shah pynjulor ha ki ophisar ka tnad kam khlaw kaba hap hapoh ka Lowerpoa Range.

Ka BVKJWO bad ka KSU BVC kila dawa ban siew bai lutksan halor kane ka jingpynjulor ka tnad ka kam khlaw bad la dawa ban pynshitom iaki nongtrei bad ophisar ka Lowerpoa Range.

U Wanbor Pdang, general secretary BVKJWO, ula ong ba ka tnad kam khlaw jong ka Assam kam dei ban shuh thombor iaki paid Khasi Pnar kiba dei ki nongri nongsumar iaki khlaw ki btap bad kiba biang iaki kot ki sla. Ula banjur na ka sorkar Assam ba ka dei ban pynshitom ia kita kiba leh beaiñ bad kyntur iaki jaka ka tnad Forest katkum ki kyndon jong aiñ.

Kine ki arseng kila dawa na ka sorkar Assam ban siew iaka bai lutksan hapoh 10 sngi sha kine ki saw tylli ki longiing kiba la shah pynjulor ki jaka rep bad la byrthen ban iakhih tyngeh haduh bala ioh iaka hok.