Pom naphang bad jynrat dusmon ki runar iaki tynrai kwai ha Borkhat bad Natbor

Syllad | The Rising MeghalayaFebruary 14, 2021

Ki runar kiba ym lah satia ban ithuh kila pom dusmon iaki tynrai kwai kiba rep da ki nongrep jong ka shnong Borkhat bad Natbor, ki shnong kiba hap ha Elaka Lakadong.

Kine ki jaka rep ki don harud ka Wah Prang kaba long ka jaka khappud bad ka India Bangladesh.

Haduh 18 ngut ki nongrep jong kine ki shnong kila ngat ha kane ka jingshah pynjulor ki tynrai kwai bad dieng kwai da ki hajar tylli.

Na ka liang u Waheh shnong ka Borkhat bad Natbor u ma Kyrmen Swer bad u ma Lap Suchen kila iathuh ba kane ka jingjia kala jia haka 4 tarik une u bnai Rymphang.

Haba kylli, kila ong ba kim ithuh satia iaki briew kiba pom bad jynrat dusmon iaki tynrai kwai namar ba ia kane ka kam la leh hadien ba ki trai bri kila leit phai shala shnong. Ha kane ka sngi baroh ki trai bad ki nongap bri kila leit phai sha shnong namar ba don ka kam shnong.

U ma Kyrmen ula ba na kaliang ki ar shnong kila mudui da ka jingujor ejahar ha khmat ki pulit ha Lad Rymbai Police Out Post haka 12 tarik pyrshah ia ar ngut ki briew kiba la suba donkti ha kane ka kam.

“Kine ki dieng kwai kidei kiba la ri la sumar la 5-6 snem bad sa tang katto katne snem la dei por ban ioh kheit ia u soh, pynban la jia noh kane ka jingjia kaba la wanrah iaka jingsngewsih ia baroh ki paid nongrep kine ki ar shnong,” la ong u ma Kyrmen bad bynrap ba ka jingjulor kala kot da ki lak lak tyngka.