Puk mih ki nongtrei ASHA sha surok ha Shillong mutlop ka sorkar ban pynioh iaka jingdawa

Syllad | The Rising MeghalayaMarch 4, 2022

Wat ha kum kane ka por ba hiran ka ioh ka kot bad ba rem ki mar mata ban pynbiang iaki jingdonkam ha ki iing ki sem, pynban ki nongtrei ASHA ki hap ban mad bad im iaka jingim kaba syrtok tang da ka bai bylla kaba T.66 shi sngi bad ka bym thikna ban ioh manla ka bnai.

Pynban kaba sngewthamula ka tnad ka koit ka khiah jong ka sorkar MDA mynta la ar snem kynthih kam shym la siew satia iaka pisa ne ka nong kaba ki dei hok ban ioh wat hadien ba kila tied iaka jingkhang ka sorkar na ka por sha ka por.

Ki nongtrei ASHA hapoh jong ka All Meghalaya ASHA Workers Union (AMAWU) haka sngi Thohdieng namar ka jinglong mutlop ka sorkar kila mih paidbah puk da ki hajar ngut ban tur sha Secretariat ban dawa ia ka jingsiew naka Sorkar, kaba la sah pondeng la 2 snem ha baroh ki district ha Jylla.

Hynrei namar ka jingdon jong ka Dorbar Mang Tyngka jong ka Jylla ki la leit shong noh ha Madan Malki, Shillong.

Ki nongtrei ASHA na kylleng ki district jong ka Jylla kynthup iaka Khasi Jaintia bad Garo Hills kila pynlong iaka jingiaid paidbah kaba la sdang na phyllaw ka ophis MTC kaba don ha Khyndailad sha Madan Malki, da kaba rah ruh ryngkat ki plakad ba la thoh ia ki jingdawa ban siew noh ia ka pisa basah bad ban pynkiew ia ka bainong.

Ki plakad kiba la rah ki nongtrei ASHA ki don iaki jingthoh kiba shai kdar, kata ban dawa na ka sorkar ban siew noh ia ka pisa naduh u snem 2020 ba ki dei ban ioh, bad ban dawa pynkiew noh ia ka bainong na ka T.66 sha ka T.300 shi sngi.

Ka AMAWU kala dep pyntip bad ki la dep phah da ka jingthoh ban ioh iakynduh ia u Myntri ka koit ka khiah, u James PK Sangma mynta ka sngi bad lada na kaliang u Myntri um treh ban iakynduh kila byrthen ban leit tur beit sha Secretariat, wat ban sah miet syndon hakhmat katei ka jaka treikam ba hehduh ka Sorkar jylla lada ka sorkar kam sngap ia ki jingdawa ka jong ki.