Puk tur ki nongshong shnong ka Jarain sha JHADC ban dawa waheh shnong

Syllad | The Rising MeghalayaOctober 18, 2021

Kynsan kynsan ki paid nongshong shnong jong ka Jarain, Amlarem Sub Divison kaba hap haka Elaka Amwi kila mih paidbah bad tur puk ha phyllaw jong ka Jaintia Hills Autonomous District Council (JHADC) ban dawa waheh shnong ba pura haka sngi Nyngkong.

Da ki phew ngut ki nongshong shnong ryngkat ka jingthoh placard bad ka jingpyrta shla kila tur sha JHADC ban dawa na ka konsil ban pynioh waheh shnong ba pura iaka shnong Jarain.

Ka kam jied waheh shnong ha kane ka shnong kala sahteng naduh u snem 2019 hadien bala kut ka samoi treikam u waheh shnong barim u Kliarbha Sana.

Hadien ka jingwan lynsher ka khlam COVID-19, ki shnong kim shym la ioh ban jied waheh shnong thymmai, u dolloi ka elaka Amwi ma Jemewell Pyrtuh u la thung Acting waheh shnong Ami Tariang, kaba la wanrah ka jingpyrshah na ki nongshong shnong pyrshah ia u dolloi bad iaka JHADC.

Ha u snem bala dep 2020 shisnem thik haka 17 tarik u Risaw ruh ki paidbah nongshong shnong ka Jarain kila mih sha surok ban pyrshah ia u dolloi bad ka konsil bad kila dawa ban jied waheh shnong thymmai.