Pulom ka jingthmu pynbthei bom ka HNLC ha Shillong bad Nongpoh, shah kem saw ngut 

Syllad | The Rising MeghalayaMarch 12, 2024

Ki bor pulit ka East Khasi Hills bad Ri Bhoi District ki la lah ban pynpulom noh ia ka jingthmu jong ka Seng kieng atiar  Hynniewtrep National Liberation Council (HNLC) ban pynbthei bom ha ka nongbah Shillong bad Nongpoh da ka jingioh kem noh ia sawngut ki briew kiba donkti.

U Superintendent of Police (SP) ka Ri-Bhoi District, u Jagpal Sing Dhanoa u la ong ba ha ka 11 tarik mynta u bnai ha ka por kumba 6 baje janmiet, kawei ka kali Bolero Pick-Up kaba don ia u registration number ML- 12-3243 ba la niah da u Damanbha Ripnar ka la shah bat noh ha ka lynti surok Umsning-Mawhati.

Lyngba ka jingphla jong u Damanbha Ripnar ki pulit ki la ioh ban kurup noh ia uwei u bom IED na kane ka kali ia kaba la wan ban shimti da ka kynhun Bomb Detection & Disposal Squad (BDDS) na ka nongbah Shillong.

Kine ki saw ngut kiba la shah kem noh ki dei kiba la tip kyrteng kum u Damanbha Ripnar na Umsning, u Robinis Ripnar, u Jill Tariang bad u Shining Nongrum kiba dei  na Ri-bhoi District.

Nalor kata u SP u la ong ruh ba kane ka Sleeper Cell jong ka Seng HNLC kala ioh jingbthah na ki heh nongialam kiba don ha Bangladesh na ka bynta ban leh ia ki kam pyntriem.

Na ka liang ki pulit kila rejistar case ia kine ki saw ngut ha Nongpoh Police Station Katkum ka case 25 (3) 2024 hapoh ka kyndon 120B/121A R/w 10/13/18 UA(P) Act bad 5/6 jong ka Explosive Substance Act.

Kane ka jingshah kem jong kine ki sawngut ka la wan long ruh hadien ba ki bor pulit ki la ioh ban kem noh ia 2 ngut ki briew kiba suba donkti ha ka jingpynbthei ia u bomb IED ha jaka ieng bos Syndicate ha Them Iew Mawlong kaba la jia ha ka miet sngi Saitjain ba la lah.