Pulom ka kam bret ñiut ka Jowai, mih pyrshah u paidbah ha Khliehtyrchi phiel ka jingpynjari kyndon aiñ 144 CrPC

Syllad | The Rising MeghalayaApril 23, 2022

Wat hadien ba u District Magistrate, West Jaintia Hills District ula pynjari da ka kyndon aiñ 144 CrPC, u paidbah nongshong shnong jong ka Khliehtyrchi haka miet Thohdieng ula pynpulom iaka jingthmu bret ki 7 tylli ki trok kit ñiut jong ka Jowai Municipal Board bad kane kala pynlong iaka trok ban leit theh biang iaki ñiut ha surok Thomas Jones, Jowai.

Kane ka jingthmu theh niut ha jaka jong ka JHADC kaba la tip kum ka Pangit, Khliehtyrchi kadei kaba shipor bad iaka rai la shim haka jingialang kyrkieh hapdeng ka Jaintia Hills Autonomous District Council, ka District Administration bad ka Jowai Municipal Board haka jingialang kaba long haka sngi Balang.

Da ki spah ngut ki nongshong shnong jong ka Khliehtyrchi kila lum paidbah haka jaka rung sha Pangit ban pynsangeh ia kano kano ka jingpyrshang ban theh niut ha katei ka jaka namar ba ka dorbar shnong Khliehtyrchi bad ki nongshong shnong da kawei ka sur kila pyrshah ban pyndonkam ia katei ka jaka kum ka jaka theh niut ba shipor da ka Jowai Municipal Board.

U Executive Magistrate bad ki pulit kim lah satia ban pyntreikam iaka kyndon aiñ 144 CrPC kaba khang pyrshah ban lum paidbah palat iaka 5 ngut hapoh 2 KM na katei ka jaka.

Ka hukum ka ong ba kino kino kiba leh pyrshah ne khang iaka jingbret niut ki nongtrei ka Jowai Municipal, JHADC haka jaka jong ka konsil kin ngat haka kyndon jong ka aiñ.

Pynban u Magistrate ula hap ban kyrpad iaki nongshong shnong ka Khliehtyrshi ban ailad iaki ban pyndonkam ia katei ka jaka theh niut naka bynta shipor, hynrei u paidbah da kawei ka sur ula kyang pyrta ba kim ailad ha kano kano ka dur ban pyndonkam ia ka jaka ban theh niut.

Kumta kane kala pynlong ia u Magistrate ban phah phai biang iaki trok sha Jowai ryngkat bad ki niut kiba kila kit naduh ka miet sngi Palei.

Haba la poi ha Jowai, u trai kali ne u kontrak ba kit ia kine ki niut ula theh biang iaki niut ha surok Thomas Jones, Jowai.

Shuwa kane ka Jowai Municipal Board kala pyrshang ban leit theh iaki niut sha Moolamylliang haka jaka jong u ma Damewanhi Rymbai, hynrei ki trok kit niut ka Jowai Municipal kila hap ban wan phai biang hadien ba la mih paidbah u paid nongshong shnong ka Elaka Sutnga hapoh ka lama jong ka Hima Sutnga Youth Federation ban pyrshah ia kane ka jingthmu theh niut ha katei ka elaka.