Pulom ka public hearing pynheh par mawshun ka Star Cement ha Brishyrnot

Syllad | The Rising MeghalayaOctober 19, 2019

JOWAI:  Ka jingthmu jong ka Meghalaya State Pollution Control Board (MSPCB) ban pynlong ïaka Public Hearing halor ka jingthmu ka Star Cement ban pynheh ia ka par tih Mawshun haka jaka kaba heh 42.051 hectare haka shnong Bishyrnot kala pulom noh hadien ba ba ki sengbhalang, ki paid nongshong shnong bad ki khynnah skul kila mih paidbah puk ban pyrshah jur iaka jingpynsngew paidbah haka sngi Saitjaiñ.

Kane ka Public Hearing kaba la thmu ban pynlong hynne ka sngi la pulom noh namar ba ki paidbah bad ki sengbhalang kiba pyrshah ïa kane ka jingpynheh par mawshun kila khang lynti ia baroh.

Ki sengbhalang bapher naduh ka Jaiñtia Students’ Movement (JSM), Khasi Students’Union (KSU), Jaintia Students’ Union (JSU), Hynniewtep Achik National Movement (HANM), Ka Swimmer Association ka East Jaiñtia Hills, Eastern Narpuh Border Fishing Association (ENBFA) bad ki 6 Shnong kiba don harud ka Wah Lukha kila pyshah jur ïa kane ka public hearing.

Kine ki sengbahlang kila mih paidbah khang ïaka surok ban leit sha ka jaka ba pynlong ia ka public hearing bad u DC East Jaiñtia Hills District u Bah FM Dopth ruh ula shah khang lynti ban leit sha ka jaka pynlong jingpynsngew paidbah.

Ka tnad kam khlaw jong ka sorkar Jylla kala dep ai syrnod ba ka jaka khlong mawshun jong ka Star Cement ha Brishyrnot kam hap haka jaka khlaw dang shen.

Baroh ki seng kila pynpaw ka jingpyrshah kaba jur la kane ka jingthmu pynheh par mawshun kane ka kharkhana dewbilat bad kila ieng haka nongim ba la kumno kumno ruh ym dei ban ailad ban khlong mawshun katei ka kharkhana na Brishyrnot khnang ban pynneh pynsah ïa baroh ki jingthaw ba im ha khlaw Narpuh Wildlife Sanctuary.

Ki kynhun sengbhalang bapher bapher kumjuh ki synjuk ïada mariang bad kiwei kiwei kila pynpaw ka jingpyrshah kaba jur namar ba kane ka jaka ka jan bad ka khlaw Narpuh kaba dang bun byllai ki mrad ki mreng ba kyrpang bad kan ktah ruh ïa ki um ki wah ha katei ka jaka naduh ka Wah Lukha, Lunar bad ka Umso Nallah.

Ka JSM dangshen kala ai jingujor sha u PCCF kila pynpaw ba kane ka jaka khlong mawshun ka jngai tang 1.46 KM bad 0.25 ka Eco sensitive zone kumta ki ieng haka nongrim ban pyrshah bad kam pdiang ïa kane ka jingthmu jong kane ka company ban khlong mawshun na Brishyrnot namar ba kin pyndonkam da ki tiar pynbthei ban khlong maw bad kaba wanrah ka jingkhihwin ka khyndew kaba la jia teng ha Lumshnong kaba la wanrah ka jingorpait ki iing bad jakhlia ka haw haw.

Ka JSM kala ong namar ba kane ka jaka jan eh bad ka khlaw Narpuh Sanctuary kan ktah iaki lai phet jait ki jingthaw kiba kyrpang kiba shong sah ha kane ka khlaw bad kila rai ban pyrshah beit iaka jingthmu khlong mawshun bad maw clinker na kane ka jaka ba don ha Brishyrnot.