Pulom noh ka jingpynrung FASTag iaki kali, mynjur ki Toll Plaza ban pyniaid haka rukom ba rim ha Jaintia

Syllad | The Rising MeghalayaFebruary 16, 2021

Ka jingthmu jong ka Toll Plaza ban pyntreikam iaka FASTag ha baroh ki kali ban lait pyndonkam ha kaban siew da ka pisa kala pulom noh hadien ka jingpyrshah ba jur jong ki nongniah kali kamai, ki sengbhalang bad kiwei kiwei haka sngi ba Ar.

Ka katkum ka jingpynbna jong ka Ministry of Road Transport & Highways, Government of India bad ka NHAI ba naduh 15 tarik dei ban pyndonkam da ka FASTag, hynrei kane kala wanrah ka jingpyrshah kaba jur naka All Jaintia Tourist & Commercial Vehicle Association (AJTCVA), Hynñiewtrep Achik National Movement (HANM), ka Meghalaya People United Front (MPUF), ka Meghalaya Peoples Labour Union (MPLU), FKJGP, KSU bad kiwei kiwei.

Hynne ka step kala mih ka thma ktien kaba jur hadpeng ki nongpyniaid ka toll gate bad ki kali kamai bad kane kala wanrah ka jingsahkut kali kaba jur ha toll plaza ha ka shnong Ialong, kaba la hap ban hiar syndon da ka Executive Magistrate ka Y Mawlong, u Superintendent of Police, West Jaintia Hills District Bikram D Marak bad ka kynhun pulit jong u ban pyllait ia baroh ki kali ban iaid lyngba ka toll gate khlem da hap siew eiei.

Kitei ki nongniah kali Tourist ki la ïathuh ba ki ladep siew 60 tyngka haba ki la rung lyngba katei ka Toll Plaza haka step bad hadien ba ki la wan phai na ki jaka jingleit jong ki, ki draibar Tourist ki la pyni ïa ka slip ba ki la dep siew 60 tyngka hynrei ki nongtrei Toll Plaza kila shain kuna biang iaki.

Hadien kane ka jingkynrum kynram u DC ula khot noh da ka jingïalang hapdeng ki ophisar ka NHAI bad ki sengbhalang ban iakren halor kane ka kam ha kamra treikam jong u.

Ïaka jingialang la pyniaid da u DC ka West Jaiñtia Hills, u Garod LNS Dykes haka jingiadonlang u SP ka West Jaintia u Bikram D Marak ha ka jingiadonlang kiwei ki magistor bad u DTO.

Ka jingïalang ka la long kaba khluit tar ha kaba ki sengbhalang ki la pynsngew ïaka jingpyrshah ban pyntreikam ïaka FASTag bad ka jingdaiñ kuna da kane ka Toll Plaza khamtam ïaki kali kamai.

Hadien ka jingïalang kaba la neh daki katto katne kynta ki ophisar jong ka NHAI ki la mynjur ban shim biang ïaka dor barim kata 30 tyngka shisngi. Katba ïaki kali jong ki riew shimet la rai ban shim 275 tyngka shibnai katkum ba la pynmih hukum da ka sorkar.

Ki sengbhalang kiba la iashim bynta haka jingïalang ki kynthup ïaka AJTCVA Hynñiewtrep Achik National Movement (HANM), ka Meghalaya People United Front (MPUF), ka Meghalaya Peoples Labour Union (MPLU) bad kiwei kiwei.

Ka KSU bad ka FKJGP kala ai da ka dorkhat ha u DC ban dawa ban pynneh shuwa ia bai toll gate kaba rim.