Pur ka jingdawa Law University sha Khliehriat

Syllad | The Rising MeghalayaOctober 23, 2022

Ka jingdawa ban buh iaka Law University ha Rilum Jaintia kala poi sha Khliehriat, ka district head quarter jong ka East Jaintia Hills hadien ba ka National Law School University Demand Committee kala khot iaka jingialang paidbah ha Jaintia Eastern College haka sngi Saitjain.

Kane ka jingdawa buh ia kane ka skul bah ban pule ki nongsaid aiñ kala sdang na Jowai hadien ba ka sorkar kala pynbna bad mynjur daka ordinance ban buh ia ka National Law University ha Jylla. Kumta ka National Law University demand committee ban pynsngewthuh ia u paidbah ia ka jingdonkam kane ka skul bah kala rai ban hiar kylleng ka rilum Jaintia ban dawa noh da kane ka skulbah ban ioh bhah ka rilum Jaintia.

U Dr Phervision Nongtdu, Principal Jaintia Eastern College haba kren ha kane ka jingialang paidbah, ula ong haka jingïohi jong u ba ka rilum Jaintia ka la shah iehbeiñ haka sorkar Jylla. Ula ong ba lada don ki kolej sorkar ki nonghikai bad ka jingsiew ruh kan pynbiang, bad ka bai pule ki samla pule kan long kaba khamtad.

Ula ong shuh shuh ka East Jaintia Hills District kadei kaba duk bha bad lada ka sorkar ka plie lad ban buh ïa kane ka jaka pule ha rilum Jaintia kan long ka jingïarap kaba khraw ïa kito kiba wan na ki longïing ba duna ka ïoh ka kot ban pule ha kum kine ki skulbah.

Ka Principal ka Khad Ar Daloi Law College Ka kong Rimaya Manar kala batai ba kiba bun ki lad ki lynti kin plie hadien ba la pyndep ïaka jingpule Law. Ka la ong ba ka kam muktiar kadei ka kam kaba don burom bad kaba lah ban ïarap ïaki para briew da kaba long ki nongai buit ne Legal Advisers, nongbishar haki mukotduma bad kiwei kiwei. Kiwei pat lada wan kane ka skulbah kan iarap hadien ka jingpule iaka ain kan pynsuk wat ban pynkhreh iaka kyrdan IAS

Haka jingïalang la don ruh riew paidbah, ki muktiar bad ki sengbhalang ba kynthup ka JSU, JSM, FKJGP, JYF, KSU Jaintia Hills, Synjuk ki Waheh shnong East Jaiñtia Hills bad kiwei kiwei

Ïaka jingïalang la pynïaid da u Chariman ka Committee u R .Lamarr uba la ban jur ba dei tang ka jingïatylli lah ban ïoh ïaka jingkwah. Ula ong haki 50 tylli ki snem ka sorkar Meghalaya kam ai eiei ïaka thaiñ Rilum Jaintia ha kaba ïadei bad ka pule puthi.