Pyllait paidbah iaki ar tylli ki phlim Pnar, yn sdang pyni paidbah iaka Skap ha Loompyrdi Iongpiah naduh 1-6 tarik Nohprah

Syllad | The Rising MeghalayaDecember 1, 2023

Ka Ekrami Creations Films bad ka Marks HD Entertainment kala pyllait iaki ar tylli ki phlim Pnar, kawei ka dei ‘Da Rai’ bad kawei pat ka dei ka phlim biria ‘Skap’ haka 30 tarik Naiwieng haka jingialang kaba long ha Orchid Inn Mukhla, West Jaintia Hills District.

U MLA Jowai u ma Wailadmiki Shylla ula long kum u kongsan bad u Dolloi Elaka Jowai u Ma Puramon Kynjing kum u symbud kongsan kila iadonlang ha kane ka jingpyllait paidbah ia kine ki phlim.

Ki tyngshop ki puron kiba la shim bynta ha ka phlim Skap (the brother of Skop) ki kynthup ia u Sunday Salahe, Jimmy Wann, Regina Lamo, Margreta Kynjing, Sophia Dohtdong, Dawlupaia Khyriem, Jaminson Lapasam, Phira Dohtdong nalor kiwei kiwei.

Ia phlim Skap yn sdang pyni paidbah naduh ka 1 tarik haduh 6 tarik Nohprah ha Loompyrdi Iongpiah bad hadien yn pyni sha kiwei de ki dong ki Shnong.

U Ma Ebor Muksor u director bad producer ula iathuh khyndiat shaphang kine ki artylli ki phlim kynthup naduh ka por ba shna haduh ban da pynmih. Ula iathuh haduh ban da dep pynbit pynbiang ka jinglut jingsep jong ka Skap (The brother of Skop) ka la kot sha ka 13 lak tyngka, katba ka Da rai ka jinglut ka la kot 9 lak tyngka.

U khot u wer ia baroh ban peit ia kine ki phlim ban ai ka jingkyrshan iaki bad iaki nongak ba kin lah ban ieng rasong haka kam shna phlim.

U Wailadmiki Shylla haka jingkren ula iaroh iaki nongpynmih phlim ba wat hapdeng ki jingeh kiba bun, hynrei ki iaid shakhmat ban wad ki lad ki lynti ban pynkhie im biang ia kane ka kam ha rilum Jaintia.

Ula ong ka phlim industry kadei ka karkhana kaba lah shisha ban ai kam ai jam iaki nongshong shnong hapoh ka Jylla.

Ha kaba iadei bad ka Cinema Hall, u Wailadmiki Shylla ula pynkynmaw ba haka por ka jingialap election kawei ka thong kaba u juh kren haki rynsan ialap election jong u, ka long ban ban wanrah iaka Cinema Hall namar hapoh ka Jowai Constituency ki samla ki don shisha iaka sap ka talent haka kam shna bad ak phlim.

Ula iathuh ruh iaka jingktah jong ki nongpynmih phlim kadei ka jingsiew iaka bai Cinema ha kaba 60 percent kan leit sha ki trai Cinema Hall katba ki nongpynmih ki ioh tang 40 percent halor ba ki hap ban siew ia baroh ka bai pynlut pynsep nalor ka jingsiew iaki tyngshop bad puron.

Shuh shuh ula iathuh ba hadien ba ula poi sha ka thong jong ka jingjop ula rah ia kane ka mat sha u Myntri rangbah ka Jylla bad da ka jingshemphang jong u Myntri rangbah ula pynrung noh iaka hapoh ka CM Elevate Program bad lyngba kane ka program ka sorkar kan ai ia ka jingkyrshan pisa ban sdang iaka kam haduh 75%.

Nalorkata ula pynbna ruh ba hapoh ka CM Elevate Program ka Tura, ka Shillong bad ka Jowai ki la shah jied ban ioh iaka jingiarap pisa na ka bynta ka Cinema Hall.

Kumta ula khot ka jingiatreilang khnang ba ka Cinema Hall hapoh ka Jowai kan treikam biang bad ba ka phlim industry kan im biang hapoh rilum Jaintia.