Pyllait Ambulance u Dy. CEM ka JHADC ha Tuber Shohshrieh

Syllad | The Rising MeghalayaApril 24, 2021

U Deputy Chief Executive Member Jaintia Hills Autonomous District Council (JHADC), Lasky Rymbai ula pyllait paidbah ïaka kali kit nongpang (Ambulance) ha Tuber Shohshrieh, East Jaintia Hills haka sngi Saitjain.

Ïa kane ka Ambulance la pynïoh jingïarap lyngba ka SAG Scheme jong u snem 2019-2020.

La pyllait paidbah ia kane ka Ambulance haka jingïalang kaba ka long ha phyllaw ka ïing dorbar ka shnong Tuber Shohshrieh haka jingïadonlang ki nongshong shnong kynthup naduh ki longkmie longkpa bad ki samla.

U Waheh Shnong Tuber Shohshrieh u Ma Khroo Ksoo bad Secretary Shnong u Ma Kunebha Muruh ki la pynpaw ka jingkmen kaba khraw namar ba u MDC ula pynurlong ïaka jingangnud jong ka shnong na ka bynta ban shakri ïa ka imlang sahlang lyngba kane ka kali.

“Ngi ïakren bad u MDC tang da ka ktien ban pynsngew ha u ïaka jingdonkam ban don ka Ambulance haka shnong jong ngi bad ula kloi shisha ban ïarap ïa ngi”, la ong u Waheh Shnong Bah Khroo Ksoo.

Baroh ki nongkren ba kynthup naduh u Secretary San Shnong u Ma Tyrnit Sana, u Ma Ribun Sana na Tuber Kmaishnong, u Assistant Waheh Shnong Wapung shnong u Chalan Dkhar, u Waheh Shnong Pynthor Sale u Ma Yooki Phawa bad u Waheh Shnong Rymbai u Ma Justice Lyngdoh ki la ai jingïaroh ïa u MDC uba la ïarap da ka kali ban kit ban bah bad ban pynpoi ïaki nongpang sha ka jaka sumar ban ïoh ka jingsumar haka por kaba biang.

U Lasky Rymbai uba long ruh u MDC ka thain Tuber haka jingkren ula ong, kane ka kali kan nym shakri tang ïaki nongshong shnong ka Tuber Shohshrieh hynrei wat ki shnong marjan lada ki donkam kyrkieh ha kano kano ka por.

Ula kyntu ïaki paidbah ban sumar iaka bad ban pyndonkam hok ïaka khlem da leh shiliang ïano ïano.

Kumba ka sorkar ka dang don hapdeng ka jingïaleh ban ïakhun bad ïada na ka jingsaphriang u COVID-19 ha ka Jylla u MDC ula kyntu ïaki paidbah ba kim dei ban kheiñ sting hynrei ban bud ryngkhi ïa kaei kaba ka sorkar ka la bthah ïaki ban leh ban lait naka jingpur ka khlam.