Pyllait ka Assam iaki ar tylli ki kali pik-up, sngewnguh ka dorbar shnong Khanduli iaka sorkar

Syllad | The Rising MeghalayaMarch 26, 2025

Ka tnat Forest jong ka Jylla Assam ka la pyllait noh ia artylli ki kali Bolero Pik-up jong u nongshong shnong Khanduli, West Jaintia Hills District hadien ba la kurup iaki haka 22 tarik Lber.

La kurup ia kitei ki kali hadien ka jingujor jong ki jaidbynriew Karbi na Tadonglangso ba ki nongshong shnong Khanduli ki ia pom dieng na ka khlaw ba ki Karbi ki kam trai bad la rah noh ia kitei ki artylli kali sha Hamren, West Karbi Anglong District. Hynrei na ka liang jong ka Dorbar Shnong Khanduli kala ong ba katei ka khlaw kaba ia pom dieng thang ka dang dei pura hapoh u pud u sam jong ka Shnong Khanduli.

Kawei ka pik-up kaba don ia u nombar ML04 C 3505 kaba dei trai da u Ma Hom Muruh la pyllait ha 23 tarik Lber katba ia kawei pat ka pik-up kaba don ia u nomber ML05 H 6747 la pyllait pat haka 24 tarik Lber.

Ia kine ki artylli ki kali la pyllait hadien ka jingtuklar jong ki bor pyniaid district jong ka West Jaintia Hills District hapoh ka jingialam u Executive Magistrate Ma GH Passah.

Naka liang ka Dorbar shnong Khanduli kala ai khublei kyrpang iaka sorkar Jylla kumjuh iaka bor synshar District jong ka West Jaintia Hills namar lyngba ka jingshimkhia ka jong ki, ba ka tnat Forest jong ka Assam kala pyllait noh ia kitei ki artylli ki kali Bolero Pik-up.

“Ngi aikhublei kyrpang ia u symbud Myntri rangbah ka jylla Ma Sniawbhalang Dhar uba long u MLA ka thain, u Deputy Commissioner jong ka West Jaintia Hills AK Singh, u Superintendent of Police Ma Chemphang Syrti bad kyrpang eh ia u Executive Magistrate Ma GH Passah bad Officer Incharge Saitsama Bah K Ranee kiba daka jingtrei shitom ka jong ki, ba ka tnat Forest Assam kala pyllait noh iaki artylli ki kali”, la ong u waheh shnong Ma Yooshida Nongspung.