Pyllait ka BJP Garo Hills da ka website ban khmih ia ka jingpyntreikam ia ki skhim Sorkar Pdeng

Syllad | The Rising MeghalayaJune 18, 2024

Ka Seng BJP ha Garo Hills ha ka 17 tarik Jylliew ka la pyllait paidbah ia ka website/app arigri.com ka ban khmih bad bishar bniah ha kaba iadei bad ka jingpyntreikam ia ki skhim ka Sorkar Pdeng ha ka Jylla ha ka jingiadon bynta lang naduh ki shnong ki thaw bad ki nongshong shnong kiba ioh jingmyntoi.

Ia kane ka website/app la pyllait ha ka jingiadon lang u State President ka party u Rikman G Momin.

Ka Seng ha u kyrwoh lyngba u Bernard N Marak MDC Tura ka la ong ba dei ban bishar bniah halor ka jingpyntreikam ia kiba bun ki skhim bad ban aijingtip sha ki tnat sorkar ba dei khmih khnang ban ioh ia ka utilisation certificate.

Hynrei u la ong kiba bun ki skhim ki la kylla sha ka scam ne ka kam bamsap ha kiba bun ki shnong ia kiba yn ym lah ban shah da ka BJP Arigri hapoh Garo Hills ha ka jingthmu ban trei na ka bynta ban kyntiew ia ki duk ki suk khlem da khein halor ka jingiadei bad kino kino ki party sain pyrthei.

Nalor kata u la ong ruh ba ka Arigri kan don ia ka ophis ka ban treikam pura bad ka ban pynsngap ia ki jingeh jong kito ki nongioh jingmyntoi kiba la shah pynduh noh ia ki hok ki jong ki.Kin don artylli ki bynta jong ki kynhun kiban trei hapoh ka Arigri.Kawei ka dei ka Center Scheme Monitoring Committee (CSMC) bad kawei pat ka Grassroot Review Organisation (GRO) kaba mut ha ki Garo ka jingsah ram.

Ka Sorkar ka sah ram sha ki paidbah nongthep vote na ka bynta ban pynioh ia ki jingdonkam kiba dei biang ia kiba ki riew sain pyrthei ki la kular ha ka por ilekshon hynrei kiba ha ka jingshisha ka jingsah ram jong ka sorkar sha ki paid nongthep vote ka dei ka bym shym la lah satia ban pynurlong.

Kumta kane ka app kan pynioh ia ka rynsan ban buddien ia ki jingkular ba la khlei da ki nongialam jong ki da kaba kdew halor ki jingdonkam bad ki jingkhmih lynti jong ki paidbah nongthep vote.

Ka GRO kan dei ruh ka rynsan na ka bynta ki samla ba kin rejister ia ki kyrteng jong ki na ka bynta ki flagship programme bapher bapher ia kiba la bei tyngka da ka sorkar Pdeng.

Ka kynhun na ka Arigri kin iarap lem ia ki samla ba kin beh sha ka thong kaba ki angnud ban ioh ia ki jingiarap bad jingkyrshan na ka bynta ban ioh ia ki skhim na ki tnat sorkar bapher bapher.

Ka CSMC ha kawei pat ka bynta kan khmih bad bishar bniah halor ka jingpyntreikam ia baroh ki skhim ka Sorkar Pdeng kum ka  PMAY, JJM, PM KISAN, PMGKAY, MHIS, PMGSY, NREGA, IHHL bad kiwei kiwei kynthup ha kaba iadei bad ki skul Primary bad ki jaka aijingsumar ia kiba donkam ban pynthymmai mardor hapoh ka Jylla.

Ka Seng ka la ong ruh ba ia ka Arigri mynta la pyllait tang ha ka ktien Garo, hynrei shen lehse yn sa pyllait ruh ha ka ktien English bad ruh ha ka Ktien Khasi bad Jaintia.