Pyllait ka BJP ia ka thup kyrteng ki 17 ngut ki kyrtong sha ka elekshon MDC na KHADC bad JHADC

Syllad | The Rising MeghalayaJanuary 22, 2025

Ka Bharatiya Janata Party (BJP) ha ka 21 tarik Kyllalyngkot ka la pynbna ia ka thup kyrteng kaba nyngkong  jong ki 17 ngut ki kyrtong ki ban mih iakhun ia ka elekshon Autonomous District Council (ADC) ha Rilum Khasi bad Jaintia ka ban long ha ka 21 tarik Rymphang.

Napdeng kine 14 ngut ki kyrtong ki dei ki ban mih iakhun na ki constituency kiba hap hapoh ka Khasi Hills Autonomous District Council (KHADC) bad 3 ngut na Jaintia Hills Autonomous District Council (JHADC).

Haba kren sha ki lad pathai khubor, u State General Secretary ka BJP u Bah Wankitbok Pohshna u la ong, “Kane ka dei ka sien kaba nyngkong ba ka party kan iakhun na buntylli ki seat ha ka lekshon ADC. Nga sngew thikna ba ka jingiashim bynta ka jong ngi kan iarap ha kaba ka party kan lah ban noh synniang ban pynkhlain ia ka nongrim jong ki District Council.”

U pyntip ruh ba ia ka thup kyrteng kaba ar jong ki kyrtong yn sa pynbna shwa ka 27 tarik Kyllalyngkot. Haba kylli, u Bah Pohshna u la ong ba ki don ki seat kiba don ia ka jingkyrmen ban jop na ki katto katne ki constituency ha Rilum Khasi bad Jaintia.

Ha kaba iadei bad ki jingkynnoh pyndonkam bakla ia ka pisa da ki kyrtong ha ki elekshon kiba la dep, u General Secretary u la ong, “Ngam lah ban kynthoh ei ei halor kaei kaba la jia ha ki elekshon kiba la dep, hynrei hooid ngin pynthikna ba ki kyrtong kiba ngi la pynbna mynta ka sngi kin leit sha madan bad rah ia ka khubor jong ka party.”

Ha kaba iadei bad ki mat treikam jong ka party, u Bah Pohshna u la ong, “Ngin sa don ia ki mat treikam napoh central ia kiba ngin sa pynbna shen ha kine ki khyndiat sngi ki ban wan, bad ngi kyrmen ba ki kyrtong kin rah shakhmat ia ka jingthmu jong u Myntri Rangbahduh ka ri na ka bynta ka ri kaba kiew shaphrang bad ba kumno lyngba ki ADC ngi lah ban long shibynta jong kata ka jingthmu. Ka mat treikam kan kynthup ruh halor ki jingthmu jong ka party ban pynkhlain ia ki nongrim jong ki ADC.”

Ki 14 ngut ki kyrtong sha ka KHADC ki kynthup ia u  Himanta Timung – Jirang, Manin Raja -Nongpoh, Hopingstone Marsharing – Mawhati, Brightstarfield Khongwir – Umsning, Councellor Mukhim – Mawkynrew, Elvisstar Kharbudon – Langkyrdem-Laitkroh, Ebren Khongthah – Nongskhen, Fairlock D Ryngksai – Nongthymmai, Kynsaibor Lyngdoh – Malki-Laitumkhrah, kong Daniella Nonglait – Mawlai, Lewis Janong Suting – Langrin, Dimandar Lyngdoh – Nongstoin, Dominic Wahlang – Rambrai-Jyrngam bad Roland Mawsor-Mawshynrut.

Katba ki kyrtong sha ka JHADC ki kynthup ia u Heimonmitre Phawa – Jowai South, Manbha Lyngdoh – Muthlong-Sohkymphor bad u  Shanbor Rymbai – Musniang Rngad.