Pyllait ka DC ia ki kali EVM ban pynkhreh Lok Sabha Election 2024

Syllad | The Rising MeghalayaDecember 12, 2023

Ka Deputy Commissioner ka East Khasi Hills District, ka Kong RM Kurbah haka 11 atrik Nohprah, ka la pyllait ia ki kali kiba kit ia ki kor Electronic Voting Machine (EVM), shibynta ban pynshai paidbah bad ban pynkhreh na ka bynta ka election MP Lok Sabha ka ban long ha u snem 2024.

Haba kren ha ka jingialang, ka Kong Kurbah ka la ong ba ka jingpyllait ia kine ka kali kiba kit ia ki kor EVM ka thmu ban pynshai bad pynshlur ia ki paidbah nongthep vote ba kin mih shakhmat ban iashim bynta shitrhem ha kane ka Lok Sabha ilekshon ka ban wan, kata da kaba kyntu ruh ia ki palat 6 lak ngut ki nongthep vote kiba la rejistar ba kin mih shakhmat.

Da kaba phaikhmat halor ka jingseisoh ha ka jingmih jong ki paidbah kaba long haduh kumba 80% ha ka ilekshon MLA kaba la dep, ka Kong Kurbah ka kyrpad ia ki nongshong shnong ka jylla ba ki dei ban pyndep ia ki hok synshar paidbah jong ki bad ban pynsngew ia la ki jong ki sur ha kane ka ilekshon ka ban wan.

Nalor kata kane ka sienjam ba la shim da ka sorkar ka thmu ruh khamtam na ka bynta kito kiba dang shu pynrung kyrteng thep vote nyngkong ba kin tip halor ka rukom pyndonkam ia ki EVM. Ka DC ka pynthikna ruh sha ki paidbah halor kine ki kor EVM hadien ba la dep ban bishar bniah bad ban leh ia ki test ha ryngkat ka jingiadon lang ki nongmihkhmat na ki party sain hima bapher bapher bad da ka jingsakhi ruh lyngba ki CCTV.

Shuh shuh kine ki kali kaba kit ia ki EVM kiba la dep leh ia ki test kin leit sha kylleng ki jaka na ka bynta ban pyni ia ka rukom treikam bad ban pynshai paidbah. Ka kong Kurbah ka pynshai ruh ba kine ki mashin ki long beit tang na ka bynta ban aijinghikai bad jingpynshai ym ban pyndonkam ha ka ilekshon kaba shisha.

Ha kajuh ka por ka pdiang sngewbha ruh ia ki nongshong shnong ba kin wan mih shapoh ka ophis na ka bynta ban sakhi da lade ia kine ki mashine khnang ba kin ioh ia ka jingshaniah kaba pura.

Haba ai khublei ia baroh kiba don bynta ka Kong Kurbah ka la ong ba kane ka jingpyllait ia kine ki kali ka dei ka kylla kaba nyngkong hapoh East Khasi Hills, bad ka jingthmu ka long ban la bteng ia kane.