Pyllait ka HNLC ia ki mat jingdawa halor ka jinglaitluid, dawa iakren markhmat bad ka Sorkar India

Syllad | The Rising MeghalayaJanuary 20, 2025

Ka Seng Hynniewtrep National Liberation Council (HNLC) ha ka 19 tarik Kyllalyngkot ka la pyllait ia ki mat jingdawa (manifesto) na ka bynta ka jinglaitluid, ka hok, ka jingiaryngkat bad ka jinglong kyrpang jong ka jaidbynriew Hynniewtrep.

Kine ki mat kiba don shiphew tylli ki bynta, ka dawa ruh ia ka jingithuh jong ka Sorkar India ia ki katto katne ki kyrdan jinglaitluid (Semi-Sovereign) jong u Hynniewtrep, ban iashim bynta ha ka jingiakren ba markhmat ban pynneh biang ia ka jingsynshar ka jong ngi bad ban pynbeit ia ki jingleh bym hok kaba la iaid da ki phew snem bad ban kubur halor ka jingpynkhein ia ka jingiateh kular (Standstill Agreement) bad ki jingleh ba pynbor jong ka Instrument of Accession (IOA).

“Kane ka manifesto ka dei ka jingpynbna jong ngi ia ka thma pyrshah ia ka jingshah banbor bad ka blueprint jong ngi na ka bynta ka jingkha pat ia ka jaidbynriew. Ka long ka jingkhot kaba shai ia uwei pa uwei u Hynniewtrep ban tip ia la ka histori, ban pdiang ia la ka jinglong, bad ban ialeh na ka bynta ka lawei jong ki. Ryngkat lang ngin bet ia u symbai jong ka jingsarong, ka jingnang jingtip, bad ka jingiatylli ha ki jingmut jingpyrkhat bad ki mynsiem hapdeng ki briew jong ngi. Ka jinglaitluid kam dei ka jingphohsniew hynrei ka dei ka jingkut jong ngi,” ong ka seng ha u kyrwoh.

Ha ka bynta kaba shiphew jong ka manifestor ka HNLC haba dawa ia ka Semi-Sovereign Status na ka bynta u Hynniewtrep ka la ong, “Ki paidbah ka Bri u Hynniewtrep ki dawa ban ithuh noh ia ka kyrdan Semi-Sovereign jong ngi kaba don tynrai ha ki jingiateh kular jong ka Instrument of Accession (IOA) bad ka Standstill Agreement of 1947. Kine ki jingiateh kular kiba thmu ban iada ia ka jingsynshar shimet jong ngi la soi lyngba ka jingpynbor bad hapdeng ka jingbym shonghok ba la leh da ka sorkar India.

Ka Standstill Agreement jong u August 1947, ba la iasoi hapdeng ka Federation of Khasi States bad ka sorkar India ka long ban ailad ia ka por kaba ar snem ban iakren ia ka jingiadei jong ngi. Hynrei, kane ka jingiateh la pynkhein hapoh lai bnai, bad hapoh ka jingpynbor jong ki shipai, la pynbor ia ki nongialam ka Hynniewtrep ban soi ia ka IOA ha u bnai Nohprah 1947. Kane ka jingshet kylla ka la pynkylla ia kaei kaba la mut ban long ka jingiasoh da ka mon sngewbha bad kaba don burom sha ka jingpynrung jubor kaba la pynduh noh ia ka hok ha la kolshor, ka sain hima sima bad ha ka ioh ka kot.

Lah 77 snem mynta ia ki jingkular ba la buh ha kine ki jingiateh la iehnoh bein, kaba la lam sha ka jingpynjor ia ka jingsynshar jong ngi bad ka jingshah pyndonkam bakla ia ki jingdon jingem jong ngi. Ka jingbteng ban kyntait ia ka jingsynshar hi jong ngi ka long ka jingpynkhein beit ia ki nongrim ba la ia mynjur ha ka snem 1947 bad ka jingbteng ia ki jingleh bym hok pyrshah ia ka jaidbynriew Hynniewtrep.”

Ngi dawa na ka Sorkar India 1. Ban pdiang ia ka jingpynkhein ia ka Standstill Agreement bad ka jinglehnoh ba pynbor jong ka IOA. 2. Ithuh ia ka jinglong semi-sovereign jong u Hynniewtrep, da kaba burom ia ka hok jong ngi ban synshar hi dalade kumba la thmu ha ki jingiateh tynrai. 3. Ban iashim bynta ha ka jingiakren beit ban pynphai biang ia ka jingsynshar hi jong ngi bad ban pynbeit ia ka jingbymhok kaba la don da ki phew snem. 4. Bishar biang ia ka rukom synshar ba la pynjari, da kaba pynthikna ia ka jingsynshar jong ngi halor ka khyndew, ki marpoh khyndew, bad ki jingleh jingkam katkum ka kolshor.

Nalor kata ka HNLC ka khot ia ki samla jong ka jaidbynriew ban kyntait ia kane ka jinglong lyngkar bad ban kieng iaki tiar ha ka jingialeh pyrshah na ka bynta ka jinglaitluid. Lyngba ka jinglenlade bad ka jingkut jingmut kaba skhem, ngin lah n pynpra ia ki nongwan banbor bad plie ia ka lynti na ka bynta ka jingkha pat ia ka jaidbynriew jong ngi.

Shuh shuh ka Seng ka la ong ruh ba ka iohi lypa ia ka lawei ha kaba ka jaidbynriew Hynñiewtrep kan im da ka burom, ka jinglaitluid, bad ka jinglong trai hapoh ka sorkar kaba iada i ki hok jong ki bad kaba pynneh pynsah ia ki pateng jong ki. Kane ka dei ka jingkular kaba skhem ban pynbeit ia ki jingbymhok kiba la don ha ka histori bad ban tei ia ka imlang sahlang kaba don tynrai ha ka jingiaryngkat, ka jingburom bad ka jingiatylli.

Haba pynpaw ia ka jingthmu jong ka na ka bynta ka lawei, ka HNLC ka la ong ba ka thong ba kongsan jong ka ka long ka jingsuk bad ka hok kaba burom iaka jaidbynriew Hynniewtrep.

“Ngi pyrkhat ia ka lawei ha kaba: Ki briew jong ngi ki ioh biang ia ka jingsynshar kaba pura halor ki jaka bad ki marpoh khyndew jong ki. Ka pynneh pynsah bad burom ia ka kolshor bad ki rukom synshar jong ngi bad ka jingsynshar laitluid jong ngi ha ka sain pyrthei bad ka jingithuh,” ka la bynrap.