Pyllait ka KHNAM ia ka manifesto ba 15 tylli ki mat hakhmat ki dur mot ki nongialeh laitluid

Syllad | The Rising MeghalayaFebruary 10, 2025

Ka Khun Hynniewtrep National Awakening Movement (KHNAM) ha ka 10 tarik u Rymphang ka la pyllait paidbah ia ki mat treikam ne manifesto jong ka seng na ka bynta kane ka elekshon MDC sha ka Khasi Hills Autonomous District Council (KHADC) ka ban long ha ka 21 tarik u Rymphang.

Ia kane ka manifesto la pyllait paidbah da u Bah James MA Neng General Secretary ka KHNAM ha kaba ka la don ruh ka jingpynkular ia baroh ki 11 ngut ki kyrtong jong ka hakhmat ki dur mot jong ki 3 ngut ki nongialeh laitluid ka Jylla, kata u Kiang Nangbah, u Tirot Sing Syiem bad u Patogan Sangma ha State Central Library.

Katkum ka manifesto ka KHNAM ka la kular ban wanrah ia ka jingtreikam kaba khuid ba suba hapoh ka District Council, ban shim ia ka sienjam ban pynjanai bad pynbha ia ka Khynrnit ba Hynriew (Sixth Schedule) jong ka Riti synshar ka Ri India, ban dawa ba dei ban pynduh noh ia ka para 12 (A) na ka khyrnit ba hynriew, ban lum jingtip halor ki jaka ki puta kiba don hapoh u pud u sam ka Council bad ban pynlong ain (codify) ia ki riti dustur ha ki It ki Hima ki Elaka.

Ka la kular ruh ban pynthikna ban pynneh pynsah bad pynkhlain ia ka bor laitluid (Autonomous power) jong ka Council, ban pynkhlain ia ka Pla Pisa ka Council, ban pynthikna ban ioh ia ka jingtip kaba bniah halor ka jingioh lum khajna ka Sorkar Jylla khnang ba ka Council ruh kan tip ia la ka bha bad ban pynduh ia ka jinglum pisa beain lyngba ki Hima bad ka Council.

Ka manifesto ka la kular ruh ban pyntreikam hok ia ka Trading by Non Tribal Regulation 1954 ban iada ia ka khaii ka pateng jong ki trai ri trai muluk, ban pynkylla ia ki katto katne ki bynta jong ka Regulation katkum ka jingiaid ka por bad ban pynduh noh ia ki laisen jong ki kam kiba u Khasi u la lah ban trei bad ban pyndonkam ia ka Non Tribal Regulation 1954 ban ai mynsiem ia ki khun samla ban sengkam bad ban ioh kam ha la ka Jylla.

Ka la kdew ruh ba ka ain kam shah ia ki bym dei ki Khasi ban long Rangbah Shnong, hynrei la lap ba don ki shnong kiba ki jaidbynriew bym dei Khasi ki long Rangbah Shnong kaba wanrah ia ka jingma halor ka hok longtrai halor ka khydew ka shyiap. Namar kata ka Seng kan pynbeit ia ka rukom treikam jong ki It ki Hima ki Ilaka katkum ka jingai bor jong ka Ain.

Ka Seng ka kular ruh ban pynioh pat ia ka bor ba ai (issue) syrnot Riewlum (Schedule Tribe Certificate) da ka Council bad ban dawa ruh ban pynbeit thymmai ia ka Schedule Tribe Order 1950. Ka Seng kan pynthikna ruh ba nangne shakhmat kan don noh da ka rukom thung kam kaba khuid ba suba ha ka lynti kaba dei.

Nalor kata ka la ong ba ka sorkar Jylla lyngba ka Notification 1982 ka la pynlong ban register ia ka khyndew bad ka sorkar Jylla da kaba pynshong nongrim na ka Registration of Land 1908. Ka khyndew ka hap hapoh ka Para 3 jong ka Sixth Schedule, namar kata ka Seng kan iasaid ban pyndam noh ia kane ka notification 1982 bad ban Register noh ia ki khyndew bad ka Council.

Shuh shuh ka Seng KHNAM ka la ong ruh ba kan ym riej ne sheptieng ban mih shakhmat na ka bynta ki dawbah jong ka jaidbynriew.