Pyllait ka PMR ia ka kali ba lah ban rung Wheelchair ban pynsuk ia kiba duna dkhot met

Syllad | The Rising MeghalayaMarch 23, 2025

Ka Physical Medicine & Rehabilitation Centre (PMR) ha ka 22 tarik u Lber ka la pyllait paidbah ia ka kali Wheelchair-Accessible Vehicle ne ka kali kaba lah ban rung ka wheelchair ha Shillong kaba thmu ban pynsuk na ka bynta kito ki briew kiba don jingduna ha ki dkhot met.

Ia kane ka kali la pyllait da u Rev. Dr RR Cunville ha ka jingialang kum u oongsan ha ka jingiadon ryngkat lang u Dr. G Rangad, u pastor Terrence William Wanshong, bad ka Dr Lahunlang Sohliya Director jong ka PMR.

Ha kane ka jingialang la ioh ruh ka jingkren na ka Dr. Lahunlang kaba la pynshai halor ka jingangnud kaba la don ha kaba iadei bad kane ka jingthmu da kaba kdew halor ki jingeh kiba ki la mad da ki briew kiba don jingduna ha ki dkhot met.

Ka la ong kiba bun ki nongpang ki iakynduh ia ka jingeh kaba khraw haba ki leit ban shim dawai ne ban leit sha ki iingmane ne ban leitkai sha iing ki paralok, bad kane ka ktah shibun ia ka jinglong ha ka met ka phad ka jong ki bad ia ka bor pyrkhat bad kaba lam sha ka jingsngew tmang bad long marwei.

Kane ka kali Kia Carens ka dei kaba rung haduh 6 ngut ngut kynthup ia kawei ka kali wheelchair. Ka bynta kaba kongsan kadei ka jingdon ia ka ‘Ramp’ kaba ar mitar ban pynsuk ban pynrung ia ka wheelchair ia kaba lah ruh ban teh, ki seat belt ia baroh kiba shong hapoh ka kali bad ka jingkylluid ka jaka.

Na ka liang ka Dr. Sohliya kala pyntip ba ia kane ka projek la lah ban pynurlong lyngba ka jingioh ia ka grant na ka PRIME Meghalaya bad ka jingkyrshan jong ka Myntri ka Tnad ka koit ka khiah ka Dr. Ampareen Lyngdoh. Nalor kane ka jingnoh synniang, la pynlut ruh nalade ban pyndep ia ka jingshna pynbha ia ka kali.