Pyllait ka Sorkar ia ka Post Matric Scholarship sha ki 11,858 ngut ki samla pule

Syllad | The Rising MeghalayaApril 23, 2025

Haba ai ia ka jingtip bathymmai ha kaba iadei bad ka jingpyllait ia ka Post-Matric Scholarship na ka bynta ki samla pule ST jong u snem 2023-24, u Commissioner & Secretary ka Tnad Education u Vijay Kumar Mantri u pyntip ba haduh mynta ka sngi Balang la dep ban thep ia ka pisa sha ki bank account jong ki 11,858 napdeng ki 13,719 ngut ki samla pule.

U la ong ba la kyrpad ruh ia ki bank ba kin pynkloi ban phah noh ia ka pisa sha ki bank account jong kitei ki samla pule, katba ha kaba iadei bad ki 1,861 ngut kiwei pat ki nongioh jingmyntoi la shem ba kim pat shym la pyniasoh satia ia ki bank account jong ki bad u Aadhaar.

“Ban weng ia kane ka jingeh, la phah ia ki SMS sha ki samla pule kiba shah ktah ha ka 22 tarik Iaiong 2025, ha kaba la kyrpad ia ki ba kin pyndep noh ia ki jingdonkam hapoh ka 15 sngi khnang ban lah ban pyllait noh ia ki scholarship jong ki,” u la bynrap.

La kyntu ruh ia ki samla pule ba lada ki don kano kano ka jingeh ne kwah ban kylli jingkylli ki lah ban phone sha ka CM CONNECT helpline number 1971 lane ha u number 18003456851 lane ki number ka Department +91 7005037347 | +91 9077574956.