Pyllait ka Sorkar iaka bhah ka JHADC haduh T.30 klur, sngewnguh ka konsil ia u Conrad

Syllad | The Rising MeghalayaJune 20, 2024

Ka Sorkar Jylla kala pyllait iaka song pisa jong ka Jaintia Hills Autonomous District Council (JHADC) T.30 klur naka bhah khajna jong u dewiong.

Kane ka wan jia long tang hadien bad ki dkhot ka Executive Commmitee ka konsil bad ka District Executive Committee jong ka NPP kila kyrpad ia u Myntri Rangbah Conrad K Sangma haka 6 tarik Jylliew ban iarap pyllait iaka tulop shuwa ka Behdieñkhlam.

U Chief Executive Member (CEM), JHADC, Bah Thombor Shiwat haka 20 tarik Jylliew, ula ong ba ka Sorkar Jylla kala dep ban pyllait iaka pisa T.30 klur sha ka konsil.

Ula ong ba na na kane kaba sah ka long sa T.50 klur na ka khajna dewiong bad 9.91 klur na u mawshun bad kiwei.

Na kaliang u Myntri Rangbah Conrad K Sangma ula kular ban shimkhia ban pyllait sa kine ki ba sah ha kine ki sngi ban wan, la bynrap Bah Thombor.

U CEM bad ka Executive Committee kaba u ialam baroh kawei kala pynpaw iaka jingsngewnguh ia u Myntri Rangbah ka Jylla Conrad K Sangma uba shimkhia ban iarap iaka konsil ban pyllait ia ka bhah ka konsil na ka bynta ba kan ioh ban pyllait iaka tulop ki nongtrei jong ka konsil.

“Kane ka jingshimkhia u Myntri Rangbah Conrad K Sangma ban pyllait iaka pisa, ka pyni ba u dei u briew uba pyndep ia kaei kaba ong bad ka juban lak kaba u khlei,” la ong u ma Thombor bad bynrap ruh ba u kyrmen ba ka sorkar MDA 2.0 haka jingialam jong u Myntri Rangbah kan shimkhia ruh ban pyllait iaka bhah ka konsil manla u bnai khnang ban ym thut ka jingpyniaid iaki kam ki jam jong ka konsil.