Pyllait ka sorkar iaka projek ba T.400 klur tyngka ban nangpynkupbor ïa ki nongrep bad ïada ïa ki khlaw

Syllad | The Rising MeghalayaFebruary 16, 2024

Ka Sorkar Jylla haka 15 atrik Rymphang, ka la pyllait ka mat pyntreikam halor ka jingmang kaba kot T.400 klur tyngka halor ka jingthmu ban pynkup bor ïa ki paid nongrep bad kumjuh ruh ban pynlong ki program kiba thmu ban ai jingïada ki khlaw ki btap.

Ha ka jingkren ha ka jingïalang jong ka Meghalaya Next Event kaba la pynlong ha Convocation Hall, NEHU, u Myntri Rangbah u la ong, “Paralok ha ka jingbatai lyngkot mynta ka sngi ka sorkar jylla ka la pyllait ki mat pyntreikam, ha ka jingmang kaba kot sha ka T.400 klur tyngka. Na ka liang jongnga bad ka sorkar, ngi phaikhmat ban pynkupbor ïa ki briew lajong bad kumjuh ruh la kajong ka imlang ka sahlang.”

Hadien kane u la pyntip ruh ba ka sorkar ka la plie 15 tylli ki jaka saiñ jingbam bad kawei kawei napdeng kine ka dei kaba la mang ha ka jinglut kaba long T.1 klur tyngka baroh ka la kot sha ka T.15 klur kaba la dep ban pynlut bad la buhthung ban plie kumba 200 tylli kine ki jaka saiñ jingbam lyngba ki jingthung bad baroh kine ki dei kiba la thmu ban plie lut mynta u snem.

Shuh shuh na ka liang u Myntri Rangbah u la pyntip ruh ba ka sorkar ka don jingmut ban wanrah kawei ka mat pyntreikam kaba kham pher ba la tip kum ka Green Meghalaya program bad ïa ka cheque yn sa sam ha kaba ïadei bad kane ka mat pyntreikam. “Ngi lah pyrshang ban khanglad ïa ki briew ban pynjulor ïa ki khlaw ki btap bad nga sngewkmen ban pyntip shaphi ba ngi la lah ban ai jingïada bad pynneh ki khlaw ki btap ha ka jaka kaba heh 50,000-hectare tang hapoh arsnem, bad mynta ngi dang buh thong sa ban kot kane ka jingpynneh sa kumba 1.5 lak hectare. Mynta ka sngi, kan don ka jingsam pisa kaba kot sha ka T.12 klur tyngka sha ki kynhun bapher bapher kum shibynta ka jingpynkup bor  ïaphi ban ïada la kijong ki khlaw ki btap bad la ki jong ki khyndew ki shyiap.”

U la kren ruh ban weng bad kdat  noh  ka jingartatien bad tieng kaba la rung ha ki paidbah  ba ïoh ka don ka jingshah knieh noh ka jaka jong ki hapdeng ka jingshim ïa kane ka pisa kaba la sam da ka sorkar, u la pynthikna ba ka jaka ka dei ka hok jong ki bad ka sorkar ka shu ïarap bad trei tang ban ai jingïada na ka bynta ki khlaw ki btap.

Haba kren pat halor ka FOCUS program, u Myntri Rangbah u la ong ,”Nga sngewkmen ban pyntip ba ha kine ki arsnem ba la dep, ngi la dep sam ka pisa kaba kot sha ka T.100 klur tyngka sha ki ar lak tylli ki longing ha kylleng ki jaka jong ka jylla bad kane ka dei ka bhah kaba nyngkong bad kumjuh ruh ka sien kaba nyngkong jong kane ka program, ngi angnud ban gin lah ban kner kane ka jingïarap sha ki 4,50,000 ngut ki nongrep, kaba long ka jingpyrshang kaba radbah,  bad hapdeng  ba dang pyntyllun kane ka jingkner jingïarap bad kumba nga la kular ha ki jingïalang bapher bapher, mynta ka sngi ngi la pyllait biang kane ka mat pyntreikam sa san snem kynthih.”

U la ban bad ong “Mynta ka sngi, ngi la pyllait pisa kaba kot sha ka T.3.5 klur sha ki 517 tylli ki kynhun. Baroh ki nongrep kin ïoh mar 5000 tyngka manla u snem bad lada phi multiply ïa kane ka 5000 sha ka san snem ka mut ka pisa ba uwei uwei u nongrep u ïoh ka long T.25,000 tyngka. Bad nga kyntu ïa baroh ki kynhun ba phi dei ban pyndonkam thikna ïa kane ka pisa ba ka lah ban pynseisoh, khnang ba phin shah jied biang ha ka jingsiew kaba bud ruh”.

Ka sorkar ha ka jingïasnohkti lang bad ka KFW ka la thaw ïa ka MegARISE, u la ong “kane ka dei ka jingpyrshang ban ai jingkyrshan  halor ka jingpynbit pyngbiang ki jingdonkam halor ki thymmei jong ka jingdon jingem ha ka mei mariang, kumjuh ruh ban lah ban pynjanai bad khamtam na ka bynta ka thymmei jong ka jingim jongngi bad kata ka dei ka Um. Ka MegARISE ka dei ka mat pyntreikam kaba kongsan, bad ban pynleit jingmut khamtam na ka bynta ka jingpyllang bad tyngkai um ha sorbah Shillong bad Tura kiba jur ka jingshah ktah na kiba bun ki jingpyntreikam kumjuh ruh ka jingnangjyllei ka jingbun briew bad hapdeng ba ki dei ki jaka sor. Nga ngeit skhem ba ka MegARISE kan lam lynti ban nangpynjanai halor ka jinglah ban weng ki jingeh ba ïadei bad ka jingduna bad kyrduh um ha ka jylla”.

Ha ka jingpyntip ba ka KFW ka dei kawei na ki tnad treikam ba la bei tyngka da ka Germany bad ka dei ka tnad treikam ba khmih  halor ka MegARISE,  u Commissioner bad u  Secretary, ka sorkar jylla u  Dr Vijay Kumar u la ong ba ka MegARISE ka dei ka mat pyntreikam kaba la mang halor ka jinglah ban pyllang um na ka bynta ki jaka ba don hapdeng ka jingshah ktah na ka jingduna bad kyrduh um.

U la ong ruh “Ngi don artylli ki jaka ba lah ban pyllang um, kawei ka dei ka Umïew ha Khasi Hills. Kaba ar pat ka dei ka Ganol ha Garo Hills. Kane ka mat pyntreikam ka dei kaba la thmu ban ai jingïada ïa kum kine ki jaka pyllang um khnang ba ka jingsam um sha ki jaka sor jong ka jylla ba kynthup ka Shillong bad Tura ki don hapdeng ka jingïada bad kaba don hapdeng ka jingsumar sukher na ka bynta ka ban wan”.