Pyllait ka Sorkar Pdeng sa T.85 klur na ka bynta ka scholarship ki samla pule

Syllad | The Rising MeghalayaMarch 22, 2025

Ka Sorkar Pdeng ka la pyllait ia ka instalment kaba khatduh jong ka scholarship kaba kot T.85.0779 klur hapoh jong ka skhim ‘Umbrella Scheme of Post Matric Scholarship for ST Students for the Academic Session 2023-2024’ sha ka Jylla.

Haba pyntip ia kane haka sngi Thohdieng, u Myntri Rangbah ka Jylla u Conrad K Sangma u la ong, “Nga sngewkmen shibun ban pyntip mynta ka sngi ba ka Sorkar Pdeng ka la pyllait ia ka instalment kaba khatduh jong ka scholarship kaba kot sha ka T. 85.0779 klur hapoh jong ka skhim ‘Umbrella Scheme of Post Matric Scholarship for ST Students for the Academic Session 2023-2024’.

U CM u pyntip ruh ba kane ka pisa kan sa poi sha ki account jong ki samla pule tang hapoh ka 1-2 sngi.

U la ong ba ia kane ka instalment kaba khatduh ba la pyllait yn sam sha ki 27,327 ngut ki samla pule.

U la pyntip ba ia ka instalment kaba nyngkong kaba kot T. 42.32 klur la pyllait ha ka 24 tarik u Jylliew 2024, ha kaba ia kane ka pisa la sam sha ki 17,364 ngut ki samla pule.

Katba ia ka instalment kaba ar kaba long T.66.67 klur u la ong ba la dep ban pyllait ha ka 20 tarik u Naiwieng 2024, ha kaba la sam sha ki 32,064 ki samla pule.

“Na ka liang ka Sorkar Jylla ka kut jingmut ban nangpynjanai bad pynsted ha kaba iadei bad ka scholarship man la u snem khnang ban pynthikna ia ka jingkyrshan ba kham kloi na ka bynta ki samla pule ka jylla,” ong u CM lyngba ka rynsan X (kaba tip mynshuwa kum ka twitter).