Pyllait ka Sorkar T.15 lak sha ka Mawlai Town Dorbar ban iarap ha ka jingiakhun pyrshah drok

Syllad | The Rising MeghalayaMay 21, 2024

Ka Sorkar Jylla haka 20 tarik Jymmang ka la pyllait biang ia ka jingiarap pisa kaba long T.15.65 lak kum ka jingiarap kaba ar sha ka Mawlai Town Dorbar (MTD) na ka bynta ban kyrshan ha ki jingialap pyrshah drok bad ban iasyllok na ka bynta ki samla kiba kyrni ha ki jingdih drok.

Haba kren sha ki lad pathai khubor, u Myntri ka Tnat Social Welfare u Bah Paul u la ong, “Mynta ka sngi ngi la pyllait ia ka jingiarap pisa kaba ar kaba long T.15.65 lak, kata kaba kham heh ban ia kaba la pynioh ha kaba nyngkong kaba long T.6 lak ia kaba la pyllait ha u bnai Naiwieng jong ka snem ba la dep halor kam iakhun pyrshah drok jong ka MTD bad ruh na ka bynta ban ai ka jingiasyllok ia kumba 30 ngut ki samla kiba kyrni ha ki jingdih drok khnang ba kin lah pat ban lait na une u jingdih ba shyrkhei.

“Lyngba kane ka jingiarap pisa, ka MTD kan lah shuh shuh ban bteng ia ki jingtreikam ki jong ka bad ban kynthup shuh shuh ia ki briew kiba la kyrni hadien ba ki la don shibun kiba la ioh ia ka jingiasyllok ha ki snem kiba la dep ki la lah ban wanphai biang sha ka jingim kaba dei, bad katto katne kiba la leitphai pat bad la ki jong kiba haiing hasem,” u la bynrap.

Nalor kata u la ong ruh ba MTD ka dei ka dei ka kynhun kaba nyngkong eh ka ban wan shakhmat ban tyrwa jingkyrshan ia ka sorkar ha ka jingiakhun pyrshah drok da kaba plie lynti na ka bynta ban buh ia ki jaka iasyllok, kata da kaba kyrpad ruh ia kiwei pat ki Dorbar Shnong ba kin iasnohkti lang bad ka sorkar halor kane ka bynta.             

“Kawei na ki sienjam kaba ngi lah ban pynkloi ia ki jingiarap sha ki dorbar shnong bapher bapher ka long lyngba ka Drud Reduction Elimination and Action Mission (DREAM) mission ha kaba ki dorbar ki lah ban iarap ban pynioh jaka na ka bynta ban buh ia ki jaka iasyllok.               

Haba kylli u Myntri u la ong ba kane ka thma pyrshah drok kan ym lah ban urlong tang lyngba kawei ka Tnat treikam jong ka sorkar, bad dei na kata ka daw ngi la thaw ia ka DREAM mission kaba kynthup ruh ia ka Tnat pulit bad ka Tnat kam pohiing.

Nalor kata u Bah Paul u la ong ruh ba donkam ban pynkhlain shuh shuh ia ka jingtreikam jong ka Tnat Anti-Narcortic Task Force (ANTF) ha ki jaka rung ba kongsan shapoh Ri Lum Khasi bad Jaintia sector lyngba ka East Jaintia Hills district.