Pyllait ka VPP ia ka manifesto sha ka elekshon District Council
Ka Voice of the People Party (VPP) haka 4 tarik Rymphang ka la pyllait paidbah ia ki mat treikam ne manifesto na ka bynta ka elekshon ka ban wan sha ka Khasi Hills Autonomous District Council (KHADC) bad Jaintia Hills Autonomous District Council (JHADC) ka ban long ha ka 21 tarik Rymphang.
Ia kane ka manifesto la pyllait ha ka jingialang kaba la long ha Mawlai Umjaiur ha ka jingiadon lang ki nongialam ka VPP kiba kynthup ia u Vice President u Dr Kara Chen, Bah Batskhem Myrboh Spokesperson, State Secretary Election Committee u Bah Londoner Sohtun bad kiwei kiwei.
Katkum kane ka mat treikam la kdew ia ka jingburom bad bud ryntih ia ka Riti Synshar jong ka Ri India, ka jingiakhun pyrshah ia ka bamsap da kaba pynthikna ia ka jingsynshar kaba shai bad ba khuid jong baroh ki artylli ki Autonomous District Councils (ADC), bad ban iada ia ki hok bad ka bha ka miat jong ki trai ri trai muluk.
Ka seng ka la ban jur ruh halor ka jingdonkam ban pynjanai shuh shuh ia ka jingpyntreikam ia ka Sixth Schedule jong ka Riti Synshar ka ri India, ban pynkhlain ia ki tnad tynrai (dorbar shnong), ban wanrah da ki kyndon bad pynbha ia kiba la don lypa khnang ban weng ia ki jingeh kaba ki paidbah ki iakynduh.
Ka la kular ruh ban wanrah ia ki ain ki ban iada halor ki hok ha ka khyndew ka shyiap jong ki nongshong shnong bad ban pynthikna ba kan ym don ka jingshim kabu ia kiba duk bad kiba shah ban bein da kaba kular ruh ban wanrah ia ka polisi thungkam na ka bynta ka thungkam thungjam ha ki District Council.
Ka pynthikna ruh ban peit ia ka bha ka miat jong ki paidbah kiba shong ba sah ha ki thain khappud bad ban tohkit halor ki jingkynnoh kam iakajia pud bad ka Assam bad ban buddien ia ka jinglong jingman na ka por sha ka por.
Kumjuh ka VPP ka kular ruh ban wanrah ia ki ain ban iada ia ki tyllong um bad ki wah bad ban pynbha shuh shuh ia ki ain kiba la don lypa na ka bynta ban iada ia ki khlaw ki btap bad ban iada bad pynneh pynsah ia ki khlaw kyntang bad khlaw shnong.
Haba pynpaw ia ka jingdonkam ban khmih bniah halor ka jingai syrnot No-Objection Certificate na ka bynta ban seng ia ki kam karkhana, ka VPP ka pynthikna ba kiba kum kine ki karkhana ki dei ban pynmyntoi ia ki trai shnong bad bynrap ruh halor ka jingdonkam ban pynshlur bad aijingkyrshan ia ki nongseng kam trai muluk.
Ka party ka pynthikna ruh ban shimkhia ban pyntreikam ia ka e-governance, bad ha kajuh ka por ka pynpaw shai ia ka nongrim ban pyrshah ia ka kam tih uranium.
Haba pynskhem ia ka jingdonkam ban pynneh pynsah bad kyntiew ia ka kolshor ba riewspah jong ki trai ri trai muluk da kaba wanrah ia ka Museum, ka VPP ka la ong ba kan shim ia ki sienjam ban kyntiew ia ka kam jngohkai pyrthei lyngba ka kolshor ba riewspah bad ban wanrah ia ka polisi ka ban wanrah ia ka jingiatreilang kaba jan hapdeng ka District Council bad ka ki Khlieh Nongsynshar ban kyntiew ia ka khaii pateng bad ban iada ia ki nongrep.
Shuh shuh ka party ka pynthikna ruh ban kyntiew ia ka jingpynmih khajna bad ban kyntiew ia ki kam shna dawai tynrai nalor ban kyntiew ia ka pule puthi bad ia ki kam wad bniah, ban pynbha ia ki library bad ka jingthaw ia ki jaka buh jingthoh ne archives.

Leave a Reply