Pyllait ka VPP ia ka mat treikam, pynpaw ia ka jingdonkam ban pynhap ia ka Meghalaya ha ka Article 371

Syllad | The Rising MeghalayaApril 6, 2024

Ka liang pyrshah Voice of the People Party (VPP) haka 5 tarik Iaiong, kala pyllait paidbah ia ka mat treikam ne manifesto ilekshon Lok Sabha kaba don 24 tylli ki mat, kata da kaba phaikhmat ban iakhun na ka bynta ban kynthup ia ka Meghalaya hapoh ka Article 371, ka ban aijingiada ia ka Jylla na ki ain ka Sorkar Pdeng.

Ia kane ka manifesto la pyllait da u Vice President ka party u Dr Kara H Shen ha ryngkat kiwei pat ki nongialam ka party ha ka jingialang bad ki lad pathai khubor ha Shillong.

Na ka liang ka VPP ka la sei da u General Secretary jong ka u Dr Ricky AJ Syngkon kum u kyrtong u ban ia aireng ha kane ka Lok Sabha Ilekshon na Shillong Parliamentary Seat ka ban long ha ka 19 tarik mynta u bnai.

Ka party ka la ong ba kan iakhun na ka bynta ban pynhap ia ka Meghalaya hapoh ka Article 371 khnang ban iada ia ka Jylla na ka jingtreikam jong ki ain ka sorkar Pdeng kiba ktah ia ka riti dustur jong ki trai ri trai muluk.

Ka Seng ka pynthikna ruh ban iakhun na ka bynta ban ioh pynrung ia ka ktien Khasi ha ka khyrnit kaba phra jong ka Riti Synshar Ri ne Constitution bad ban kyntiew ruh ia ka pule puthi ha ka Jylla bad ruh ban pyrshah halor ka jingpyntreikam ia ka ktien Hindu bad pynneh ia ka ktien English kum ka ktien ban pyndonkam ha kaba aijinghikai hapoh ki skul bad kolej kumjuh kum ka official language jong ka Jylla.

Nalor kata ka VPP ka la rai ruh ban ieng tyngeh ban pyrshah ia ka Uniform Civil Code ba la wanrah da ka Sorkar BJP.

Haba pynpaw pyrshah ia ka jingpyntreikam ia ka Citizenship Amendment Act (CAA) ha Meghalaya, ka party ka la kular ‘Ban pynrung biang ia ka kyrteng jong ka Khasi bad Jaintia Hills hapoh ka preamble jong ka Bengal Eastern Frontier Regulation Act, 1873, namar ia kane la weng noh katkum ka Adaptation of Laws (Amendment) Order, 2019”.

Nalor kata ka pynthikna ruh na ka bynta ka jingpyntreikam ia ka Inne line permit (ILP) ha Meghalaya khnang ban lah ban tehlakam ia ka jingwan rung kyrthep jong ki briew kiba nabar bad ban aijingiada ia ki trai shnong riewlum ka Jylla.

Haba ong em ia ka jingtih Uranium ha Meghalaya, ka VPP ka la ong ruh, “Ngi pyrshah ia ka jingwanrah lynti rel khamtam hapoh Rilum Khasi Jaintia kat bym pat lah ban pyntreikam ia ki lad jingiada ban tem ia ka jingwan rung jong ki briew kiba na bar ka Jylla.”

Ka VPP ka pynthikna ruh ban bishar biang ia ka resolution kaba iadei bad ka kam ia pynbeit pud hapdeng ka Meghalaya bad ka Assam bad ban dawa tuklar na ka sorkar Pdeng na ka bynta ban pynbeit ia ka kam iakajia pud ha ka thain Block I, Block II.

Kumjuh ka l pynpaw ruh halor ka jingdonkam ban wanrah ia ka jingtreikam kaba shai, kaba khuid bad ka jinglah treikam bha hapoh ka sorkar khnang ban pynthikna ban pynurlong ia ki jingangnud jong u paidbah. 

Shuh shuh ka la kular ruh ban kyntiew ia ka tulop bad bad ka jingai jingkyrshan na ka liang ka sorkar ia ki nongtrei ASHA, ban pynbha ia ki rukom treikam jong ki Anganwadi Centre ha ka Jylla bad ban kyntiew ia ka jinglong jingim jong ki nongtrei Anganwadi, ban pan jingkyrshan na ka sorkar ban shna shuh shuh ia ki lynti surok ha ka Jylla bad kyntiew ia ka jingpyniasoh hapdeng ka Meghalaya bad kiwei pat ki Jylla ba marjan kumjuh ban kyntiew ha ka liang ka digital technology ha ka Jylla hi baroh kawei.

Ha kajuh ka por ka VPP ka la kular ruh ban kyntiew ha kaba iadei bad ka jinglong jingim jong ki briew ha ka Jylla bad ban pynbha ia ki lad jingsumar kynbat khnang ban kyntiew ia ka koit ka khiah. Ka la ong ruh ba kan pynleit jingmut ha kaba iadei bad ki lynti ropeway khamtam sha kito ki jaka kiba shem shitom ban lah pyniasoh lyngba ki surok khnang ban pynsuk ha ka leit ka wan bad ka khaii ka pateng.

Shuh shuh ka VPP ka la pynpaw ruh halor ka jingdonkam ban pynkynriah ia ki katto katne ki ophis ka sorkar pdeng na ki jaka kiba la khapngiah ha ka nongbah Shillong khnang ban lah ban pynduna ia ka jingdheng kali bad ban kham pynsuk ha ka liang ka leit ka wan.