Pyllait ki Pulit ia ka video ba pynngop ka HNLC ban leh ia ki kam dawa pisa 

Syllad | The Rising MeghalayaMarch 21, 2024

Ka Tnat pulit ka Jylla ka la lapdien ia ka jingdonkti jong ka seng Hynniewtrep National Liberation Council (HNLC) ha kaba pynngop ia ki khynnah samla ba lui lui khnang ban lah ban pyniaid shakhmat ia ki kam dawa pisa.

Ia kane la pynpaw da u Superintendent of Police (SP) ka Ri Bhoi District u Jagpal Singh Dhanoa uba la pyllait ruh hynne ka sngi Palei ia ka video ka jingiakren lyngba ka phone hapdeng u Commander ka HNLC u Sanbor Pala bad uwei na kiba donkti hakhmat eh ha ka jingpyntbei bom bad ioh kurup bomb IED ba dang shen na Nongpoh.

Une u heh pulit u la ong ruh ba kane ka la wan long lyngba ka jingphla da ki arngut kiwei pat ki briew kiba la shah kem noh hynne ka sngi Palei kumjuh da bun ngut kiwei pat kiba la shah kem.

Nalor kata u la ong ruh ba mynta ka jingtohkit ka dang iaid shakhmat ban lapdien la ki don ne em ki briew kiba la noh synniang sha kane ka kynhun kieng atiar ba la khein beain.

U la maham ruh ba kino kino ki briew kiba don jingiadei bad kane ka kynhun la ha kino kino ki rukom kin ngat ha ka jingshah tohkit bad ki lah ruh ban shah pynngat ha ki kyndon aiñ Unlawful Activities Prevention Act.

Ha kajuh ka por u la pyntip ba ki pulit ka Ri Bhoi ki la register ruh sa kawei ka case ha kaba iadei bad ka jingpynher ia ka lama jong ka HNLC ha surok bah National Highway ha Ri Bhoi district kaba la jia ha u bnai Nailar 2023.

“Ia baroh ki kam bymman jong ka HNLC la tohkit bniah lyngba ki social media bad ki rynsan VOIP platform,” ong u SP uba la bthah ruh ia baroh ba lada don ba phone na ki briew kiba kam na ka seng HNLC ki dei ban pyntip mardor sha ki pulit bad khang ruh ia ka dur bad u nombor ba iakren.

Shuh shuh katkum katei ka video ba la pyllait da ki pulit la iohsngew ia ka jingiakren hapdeng u nongialam ka HNLC u Sanbor Pala uba la pynshlur ban leh ia ka kam kaba khlem da kren shai jong ka HNLC ia kaba une u samla ula pynpaw ba um kwah satia ban leh namar ba sheptieng ioh ngat ia ki para jaidbynriew.