Pyllait paidbah iaka kot buh jingthoh halor ka khlam COVID ha Panaliar

Syllad | The Rising MeghalayaOctober 31, 2020

U Additional Deputy Commissioner ka West Jaintia Hills District u L Kynjing haka sngi Saitjain ula pyllait paidbah ïaka kot “A short Journey of the Chnong Panaliar During the Fight of COVID-19” ba la thoh da u Waheh Shnong ka Panaliar u Riquoma Rq Laloo.

La pyllait paidbah ia kane ka kot ha Ïungwalieh ka shnong Panaliar haka jingïadonlang u symbud kongsan u MDC ka Jowai South Constituency u Saron Pasweth, ki Waheh Shnong bapher ka sor Jowai, ki nongshong Shnong ka Panaliar bad kiwei haka jingïalang kaba la pynïaid da u RK Petrous Rymbai Secretary Education Committee.

U Riquoma Rq Laloo haka jingkren ula ong, ka jingïakhun pyrshah ïaka khlam jingpang COVID-19 haduh mynta mynne ka dang bteng bad ka jingpynmih jong u ïaka kot ka long shi bynta ban pynsah kynmaw ïaki pateng ban wan halor ka jingïaid lynti ka Shnong bad ha kane ka kot la thoh ïaki kam ba ka Shnong ka la don bynta ha ka ban ïakhun pyrshah ïaka khlam COVID-19 naduh ka 23 tarik March (Lber) haduh 30 tarik September (Nailur) 2020.

U Saron Pasweth haka jingkren ula ai jingïaroh ïa u Riquoma Rq Laloo kumjuh ïaki nongshong Shnong ka Panaliar kiba la iatreilang ryngkat ryngkat bad ka Dorbar Shnong ha ka ban tehlakam ïaka jingsaphriang ka jingpang khlam hapoh ka Shnong.

U L Kynjing haka jingkren ula ong, ka jingwan jong u COVID-19 ka wanrah ka jingïatylli hapoh Shnong poh thaw. Ula ai khublei ïa baroh ki Dorbar Shnong kiba la ïatreilang bad ka sorkar bad pyrshang katba lah ban ïarap ban pynsngewthuh ïaki nongshong Shnong shaphang kane ka jingpang khlam bad kumno ban iakhun pyrshah iaki jingpang kiba iabit.